Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 265 Hüküm no: 318 Orijinal metin no: [51b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hatice bt. İnayetullah’ın menzil hissesini kardeşi Abdülkâdir’e sattığı Medîne-i Hazret-i Ebî Eyyûb el-Ensârî -radiye anhu Rabbühü’l-Bârî-mahallâtından Aşçıbaşı mahallesinde sâkine Hatice Hâtun bt. el-merhûm İnâyetullah Efendi mahfil-i kazâda işbu râfi‘ü’l-kitâb li ebeveyn karındaşı Abdülkādir Efendi mahzarında ikrâr-ı tâm ve takrîr-i kelâm edip mahalle-i merkūmede vâki‘ bir tarafı merkūm Abdülkādir Efendi’nin babasından intikāl eden menzile ve bir tarafı İshak Çelebi mülküne ve bir tarafı Fâtıma Hâtun sâkine olduğu vakıf menzile ve bir tarafı ba‘zan tarîk-i âm ve ba‘zan dahi diğer Fâtıma nâm Hâtun mülküne müntehî ve mahdûd olup iki bâb fevkānî beyti ve kenîfi ve zât-ı eşcâr-ı müsmire-i mütenevvi‘a bahçeyi ve mezbûr İshak Çelebi ile müşterek bi’r-i mâyı ve garb cânibine meftûh olup karındaşım merkūm Abdülkādir Efendi ile müşterek sokak kapısını müştemil babam merkūm İnâyetullah Efendi’den intikāl eden mülk menzilimi cümle tevâbi‘ ve levâhıkı ile karındaşım merkūm Abdülkādir Efendi’ye yirmi bin nakd-i râyic fi’l-vakt fıddî akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm edip ol dahi iştirâ ve tesellüm eyledikden sonra kabz-ı semen-i ma‘dûd ve teslîm-i mebî‘-i mahdûd eyledim dedikde gıbbe’t-tasdîki’ş-şer‘î vicâhen mâ vaka‘a bi’t-taleb ketb olundu. Fî 18 Ramazân sene [10]47. Şuhûdü’l-hâl: Abdullah Efendi b. ( ) el-İmâm, Abdi Beşe b. ( ) er-Râcil, Musli b. Ali, İsmail Çelebi.