Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 265 Hüküm no: 319 Orijinal metin no: [51b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Emine bt. Abdullah’ın menzilini Ali Beşe b. İbrahim’e sattığı Medîne-i Hazret-i Ebî Eyyûb el-Ensârî mahallâtından merhûm Dökmecizâde Efendi mahallesinde sâkine Emine bt. Abdullah nâm hâtun mahfil-i kazâda işbu râfi‘ü’l-kitâb Hâssa bostancılardan Ali Beşe b. İbrahim mahzarında ikrâr-ı tâm ve takrîr-i kelâm edip mahalle-i mezbûrede vâki‘ bir tarafı Nasuh Dede tekyesi ve bir tarafı Gürcü Mehmed Bey b. Abdullah mülkü ve bir tarafı Ahmed Çelebi b. Hüseyin mülkü ve bir tarafı ba‘zan Terzibacı vakfı ve ba‘zan âhar tarîk-i âm ile mahdûd olup iki bâb fevkānî ve iki bâb tahtânî odaları ve bi’r-i mâ ve kenîfi ve eşcâr-ı müsmire ve gayr-ı müsmireyi müştemil olan mülk menzilimi cümle tevâbi‘ ve levâhıkı ile mezbûr Ali Beşe’ye otuz iki bin nakd-i râyic fi’l-vakt fıddî akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm edip ol dahi vech-i muharrer üzre iştirâ ve tesellüm eyledikden sonra semeni olan meblağ-ı mezbûr otuz iki bin akçeyi yedinden bi’t-tamâm ve’l-kemâl ahz ve kabz eyledim ba‘de’l-yevm menzil-i mezbûr merkūm Ali Beşe’nin mülk-i müşterâsıdır. Keyfe mâ yeşâ’ ve yahtâr mutasarrıf olsun dedikde merkūme Emine’nin vech-i meşrûh üzre cârî ve sâdır olan ikrâr ve takrîrini el-mukarru lehü’l-merkūm Ali Beşe vicâhen tasdîk ve şifâhen tahkīk edicek mâ hüve’l-vâki‘ gıbbe’t-taleb ketb olundu. Cerâ zâlik. Ve hurrire fi’l-yevmi’l-ışrîn min şehri Ramazâni’l-mübârek li sene seb‘a ve erba‘în ve elf. Şuhûdü’l-hâl: Mahmud Efendi b. Hasan, Nasuh Halîfe b. Mehmed, Halil Halîfe b. Mehmed, Receb Efendi b. Abdi, İsmail b. Bayram, Receb b. Hacı, Yusuf b. Mustafa, Mahmud b. Ahmed, Mustafa b. Mehmed, Mustafa b. Veli.