Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 266 Hüküm no: 320 Orijinal metin no: [51b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Arslan v. Avram’ın menzil satışından vazgeçtiği Mahmiye-i Kostantıniyye -hamâhallâhu te‘âlâ ani’l-âfât ve’l-beliyye-de Sofular hamamı kurbunda sâkin a‘lemü’l-ulemâ’i’l-izâm efdalü’l-fuzalâ’i’l-fihâm, câmi‘ü’l-fürû‘ ve’l-usûl, hâvi’l-ma‘kūl ve’l-menkūl el-muhtassu bi mezîdi inâyetihi’l-meliki’s-samed hazret-i Abdürrahim Efendi b. Mehmed tarafından ikrâr-ı âti’z-zikre vekîl olup hasm-ı câhid mahzarında İbrahim Efendi b. Mehmed ve Abdülkādir Efendi b. Mehmed şehâdetleri ile şer‘an vekâleti sâbite olan Ali Efendi b. el-Hâc Abdullah mahfil-i kazâda işbu bâ‘isetü’l-kitâb Havâss-ı Aliyye kazâsı müzâfâtından Hasköy mahallâtından Keçeciler mahallesi sükkânından olup Yahud tâifesinden Kordava cemâ‘atinden Aslan v. Avraham nâm Yahudi tarafından menzil-i âti’z-zikri mukaddemâ bey‘a vekîl olup hâlâ ikāleye vekîli nehc-i şer‘î üzre sâbite olan Lazari v. Yasef nâm Yahudi mahzarında bi’l-vekâle ikrâr ve takrîr-i kelâm edip mahalle-i merkūmede vâki‘ bir tarafı mekābir-i nasârâ tarafında olan tarîk-i âm ve bir tarafı merkūm Aslan’ın mülkü olup bundan akdem vekîl-i merkūm Lazari, Mahmud Çelebi nâm kimesneye bey‘ eylediği hadîka ve bir tarafı ba‘zan Aslan v. Moçi ve ba‘zan âharı Dursun v. Kavali nâm Yahudiler mülkleri ve bir tarafı ba‘zan Yasef v. Avra nâm ve ba‘zan âhar tarîk-i hâs ile mahdûd olup üç tabaka dâhiliyye ve hâriciyyede büyût-ı müte‘addideyi ve matbahı ve merdiven altında mahzeni ve hamam ve camekânı ve zât-ı eşcâr-ı müsmire ve gayr-ı müsmire hadîkayı ve hadîka köşesinde bir tahtânî şeşhâne odayı ve dört aded bi’r-i mâyı müştemil olan menzili, müvekkilim müşârün-ileyh hazretleri târih-i kitâbdan iki ay mukaddem mezbûr Lazari’den yedi yüz kıt‘a riyâlî guruşa iştirâ ve tesellüm eylemiş idi hâlâ nâdim olup ikāle murâd eylediklerinde müvekkile-i müşârün-ileyh hazretleri dahi tâliben li’l-ecr ve’s-sevâb mine’l-meliki’l-vehhâb akd-i mezbûru fesh ve ikāle-i sahîh-i şer‘iyye ile ikāle edip semeni olan meblağ-ı mezbûr yedi yüz kıt‘a riyâlî kebîr guruşu mezbûr Lazari’den bi’t-tamâm ve’l-kemâl ahz ve kabz edip menzil-i mezbûru teslîm eylediler dedikde mukırr-ı merkūm Ali Efendi’nin minvâl-i muharrer üzre cârî ve sâdır olan ikrâr ve i‘tirâfını vekîl-i mezbûr Lazari vicâhen tasdîk ve şifâhen tahkīk edicek mâ vaka‘a bi’t-taleb ketb olundu. [52a] Hurrire fi’l-yevmi’s-sânî ve’l-ışrîn min şehri Ramazâni’l-mübârek li sene seb‘a ve erba‘în ve elf. Şuhûdü’l-hâl: Mustafa Efendi b. Mehmed, Siyâmi Efendi b. Tahir, Mustafa Efendi b. el-Hâc İsa, Yakub b. Kurd, Ali b. Mustafa, Mahmud b. Ahmed, Cafer b. Abdullah, Ali b. Abdullah, Mustafa b. Mehmed.