Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 267 Hüküm no: 321 Orijinal metin no: [52a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Aslan v. Abraham’ın menzilini Piyale Paşa Vakfı’na sattığı Mahmiye-i Galata müzâfâtından kasaba-i Kasımpaşa kutrunda vâki‘ merhûm ve mağfûrun-leh Piyâle Paşa vakfı’na bi’l-fi‘l mütevellî olan fahrü’l-akrân Yahya Bey b. Ramazan mahfil-i kazâda Havâss-ı Refî‘a kazâsı müzâfâtından Hasköy mahallâtından Keçeciler mahallesi sükkânından olup Yahud tâifesinden Kordava cemâ‘atinden Aslan v. Abraham nâm Yahudi tarafından menzil-i âti’l-beyânı bey‘a ve kabz-ı semene vekîl olup bimâ hüve nehcü’s-sübût vekâleti sâbite olan Lazari nâm Yahudi muvâcehesinde takrîr-i kelâm edip mütevellîsi olduğum vakf-ı mezbûrun vakfiye-i ma‘mûlün-bihâsında beher sene hâsıl olan mahsûl-i vakfın mesârifinden ziyâdesiyle akār iştirâ oluna [deyû] tasrîh olunmağın vekîl-i mezbûr Lazari müvekkil-i mezbûr Aslan’ın silk-i mülk-i sahîhinde münselik olan emlâkinden mahalle-i mezbûrede vâki‘ bir tarafdan sâbıkan müvekkil-i mezbûrun mülkü olup hâlâ yine vakf-ı mezbûr için iştirâ eylediğim hadîka ve bir tarafdan mekābir-i Nasârâ tarafında olan tarîk-i âm ba‘zan Yasef v. Abraham ve ba‘zan âhar tarîk-i hâs ile mahdûd olan üç tabaka odalar ki tabaka-i ulyâsı üç bâb oda ve bir selâmlık ve bir matbahı ve tabaka-i vustâsı iki bâb odayı ve sofayı ve tabaka-i süflîsi iki bâb odayı ve selâmlık ve matbahı ve merdiven altında mahzeni ve hamam ve camekânı ve zât eşcâr-ı gayr-ı müsmire hadîkayı ve hadîka köşesinde bir tahtânî şeşhâne odayı ve dört aded bi’r-i mâyı müştemil mülk menzilini bi cümleti’t-tevâbi‘ ve’l-levâhık ve kâffeti’l-menâfi‘ ve’l-merâfık vekâlet-i mahkiyesi hasebiyle mâl-ı vakf-ı mezbûr ile bana sekiz yüz aded riyâlî kâmil guruşa tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ edip ben dahi tevliyyetim hasebiyle vakfiye-i ma‘mûlün-bihâ mûcebince menzil-i mezbûru mâl-ı vakf-ı mezbûr ile meblağ-ı mezbûr sekiz yüz aded riyâlî kâmil guruşa vakf-ı mezbûra akār olmak için iştirâ edip kabz-ı mebî‘ ve def‘-i semen eyledim dedikde mütevellî-i merkūm Yahya Bey’in minvâl-i meşrûh üzre cârî olan takrîr-i kelâmını mezbûr Lazari bi’l-vekâle vicâhen tasdîk ve menzil-i mezbûru vech-i muharrer üzre mütevellî-i mezbûr Yahya Bey’e sekiz yüz aded riyâlî kâmil guruşa vekâleti hasebiyle bey‘ edip teslîm-i mebî‘ ve kabz-ı semen eylediğini şifâhen ikrâr ve tahkīk edip bey‘ ve şart emri itmâm bulundukdan sonra menzil-i mezbûr meblağ-ı mevkūf-ı mezbûrun mekânına ondan bedel vakf olmağın mâ hüve’l-vâki‘ gıbbe’t-taleb ketb ve imlâ ve tahrîr ve inşâ olundu. Fi’l-yevmi’s-sâlis ve’l-ışrîn min şehri Ramazâni’l-mübârek li sene seb‘a ve erba‘în ve elf. Şuhûdü’l-hâl: Ahmed Efendi b. Yusuf el-İmâm, Mehmed Halîfe b. ( ) el-Müezzin, İbrahim Halîfe b. ( ) el-Müezzin, Ahmed Çelebi b. Mustafa el-Kâtib, Mehmed Çelebi b. Ramazan el-Kâtib, Mustafa Bey b. Abdullah el-Cündî, Hüseyin Beşe b. Hamza, Mehmed b. Hüseyin, Mehmed b. Bahtiyar, Mustafa Çelebi b. Veli.