Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 268 Hüküm no: 322 Orijinal metin no: [52a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Çelebi b. Hüseyin’in kiremit fırınındaki hissesini Cihan v. Fedayi’ye sattığı Medîne-i Hazret-i Ebî Eyyûb el-Ensârî mahallâtından Emir Buhârî -aleyhi’r-rahmetü’l-Bârî- mahallesinde sâkin Mehmed Çelebi b. Hüseyin mahfil-i kazâda işbu bâ‘isetü’l-kitâb Cihan v. Fedayi nâm Ermeni muvâcehesinde ikrâr-ı tâm ve takrîr-i kelâm edip Havâss-ı Refî‘a kazâsı müzâfâtından Hasköy’de vâki‘ merhûm Ali Paşa vakfı’ndan olup mezbûr Cihan ile ale’l-iştirâk taht-ı icâremizde olan kiremid fırınında mukaddemâ mezbûr Cihan şerîkler olup, hâlâ ben âhar diyâra müteveccih olmağla fesh-i şirket edip zikr olunan kiremid fırını kârhânesini mezbûr Cihan’a ferâgat eylediğimde kârhâne içinde mevcûd olup beynimizde müşterek olan matbûh tuğla ve kiremid ve ba‘zı bozuk gemi kerestesi ve demir evânîsi ve balçık peremeleri ve sâir levâzım-ı kârhâne ehl-i vukūf miyânında hesâb olundukda cem‘an yüz seksen bin akçelik eşyâ zuhûr edip benim hisseme isâbet eden eşyâyı mezbûr Cihan doksan bin akçeye benden iştirâ edip ben dahi meblağ-ı mezbûrun elli bin akçesini cânib-i mîrîden vezîr-i mükerrem Yusuf Paşa hazretlerine benden havâle olunan elli bin akçe deynim için muhtâlün-aleyh ve muhtâlün-leh rızâları ile mûmâ-ileyh Yusuf Paşa hazretlerine merkūm Cihan’dan havâle-i sahîha-i şer‘iyye ile havâle edip onlar dahi zikr olunan havâleyi kabûl eyleyip ve yirmi dört bin yedi yüz yirmi beş akçesini dahi medîne-i merkūmede merhûm Mustafa Çavuş vakfı’na zimmetimde edâsı lâzım olan yirmi bin beş yüz akçe asl-ı mâldan ve üç bin iki yüz yirmi beş akçe ribhden cem‘an yirmi dört bin yedi yüz yirmi beş akçesini deynime mütevellîsi işbu hâzır bi’l-meclis Mehmed Halîfe b. Ramazan merkūm Cihan’dan vech-i şer‘î üzre havâle edip ol dahi zikr olunan havâleyi kabûl eyledikden sonra on iki bin akçesini dahi zevcem Âişe Hâtun bt. Mahmud Çavuş’a kezâlik havâle-i şer‘iyye ile merkūm Cihan dahi havâle eyleyip mezbûre dahi zikr olunan havâleyi kabûl edip sâlifü’z-zikr doksan bin akçeden merkūm Cihan zimmetinde ancak üç bin iki yüz yetmiş beş akçe kalmışdır dedikde mukırr-ı merkūmun cemî‘ ikrâr-ı meşrûhunu el-mukarrun-lehü’l-merkūm Cihan vicâhen tasdîk ve zimmetinde vech-i muharrer üzre meblağ-ı mezbûr doksan bin akçeden üç bin iki yüz yetmiş beş kaldığını şifâhen tahkīk ettikden sonra mezbûr Cihan zimmetinde olan doksan bin akçenin cemî‘ine merkūm Cihan’ın oğlu işbu hâzır bi’l-meclis olan Arzuman nâm Ermeni emr ve kabûlü hâviye kefâlet ile kefîl bi’l-mâl olmağın mâ hüve’l-vâki‘ gıbbe’t-taleb ketb olundu. Târihuhü’l-mezbûr. Şuhûdü’l-hâl: Şeyh Mehmed Efendi b. Pîrî, Abdülkerim Efendi b. Mehmed, Murtaza Halîfe b. Mehmed, Mehmed Halîfe b. Ramazan, Hasan Çelebi b. Ahmed Efendi, Şeyh Çelebi b. Hüseyin el-Kâtib, Mustafa b. Yusuf el-Câbî, Ahmed Çelebi b. Abdullah, Mustafa Bey b. Abdullah, Oruc b. Şaban, Mustafa b. Hüseyin.