Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 269 Hüküm no: 324 Orijinal metin no: [52b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Çelebi b. Hüseyin’in kiremit toprağını Cihan v. Fedayi’ye sattığı Medîne-i Hazret-i Ebî Eyyûb el-Ensârî -radiye anhu Rabbühü’l-Bârî-mahallâtından Emir Buhârî -aleyhi rıdvânü’l-Bârî- mahallesinde sâkin Mehmed Çelebi b. Hüseyin mahfil-i kazâda işbu bâ‘isü’l-kitâb Cihan v. Fedayi nâm Ermeni muvâcehesinde ikrâr ve i‘tirâf edip Havâss-ı Refî‘a kazâsı müzâfâtından Hasköy’de vâki‘ Merhûm Ali Paşa vakfı’ndan olup, hâlâ mezbûr Cihan’ın taht-ı icâresinde olan kiremid fırınında sâbıkan zikr olunan kiremid fırınının müste’ciri olup müteveffâ olan Mustafa Çavuş i‘dâd edip bundan akdem veresesinden iştirâ eylediğim kiremid balçığı toprağını mezbûr Cihan tarafeynden îcâb ve kabûlü hâvî bey‘-i bâtt-ı sahîh-i şer‘î ile on bin nakd-i râyic fi’l-vakt fıddî akçeye bey‘ ve teslîm edip ol dahi vech-i meşrûh üzre iştirâ ve tesellüm eyledikden sonra semeni olan meblağ-ı mezbûr on bin akçeyi yedinden bi’t-tamâm ve’l-kemâl ahz ve kabz eyledim dedikde gıbbe’t-tasdîki’ş-şer‘î vechen, mâ hüve’l-vâki‘ gıbbe’t-taleb ketb olundu. Fi’l-yevmi’l-hâmis ve’l-ışrîn min şehri Ramazâni’l-mübârek li sene seb‘a ve erba‘în ve elf. Şuhûdü’l-hâl: Şeyh Mehmed Efendi b. Pîrî, Abdülkerim Efendi b. Mehmed, Murtaza Halîfe b. Mehmed, Mehmed Halîfe b. Ramazan, Hasan Çelebi b. Ahmed Efendi, Oruc b. Şaban, Şeyh Ali b. Hüseyin, Mustafa b. Yusuf.