Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 270 Hüküm no: 325 Orijinal metin no: [52b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hacı Yusuf b. Abdullah’ın Cuma b. Ali’de câriye satışından dolayı alacağı olduğu Mahmiye-i Kostantıniyye mahallâtından Tavukpazarı kurbunda Ali Paşa mahallesinde sâkin râfi‘ü’l-kitâb el-Hâc Yusuf b. Abdullah nâm kimesne meclis-i şer‘de, Cuma b. Ali nâm kimesneyi ihzâr ve mahzarında üzerine takrîr-i da‘vâ edip mezbûr Cuma târih-i kitâbdan sekiz ay mukaddem memlûke câriyesi olmak üzre bana on bin akçeye bey‘ ve teslîm eylediği Kâmile bt. Abdullah benim yedimde iken târih-i kitâbdan beş ay mukaddem sâbıkan mevlâsı olan Ahmed Çelebi nâm kimesne kendisine on altı bin akçe üzerine kitâbete kesip meblağ-ı mezbûr on altı bin akçeyi mezbûre Kâmile mevlâsı mezbûr Ahmed Çelebi’ye bi’t-tamâm edâ edip sâir harâir-i asliyyât gibi hürre olduğunu bi’l-fi‘l Rumeli kazasker olan fazîletlü Ebussuûdzâde Efendi hazretleri huzûrunda beyyine ikāme edip şer‘an isbât etmekle yedimden ıtlâk olunup sebîli tahliyye olunmuşidi semen-i mezkûr on bin akçeyi hâlâ mezbûr Cuma’dan taleb ederim suâl olunup şer‘an ihkāk-ı hak olunmak matlûbumdur dedikde gıbbe’s-suâl mezbûr Cuma cevâbında, fi’l-vâki‘ mezbûr el-Hâc Yusuf’un yedinde minvâl-i meşrûh üzre isbât-ı hürriyet eden câriye kendi merkūm el-Hâc Yusuf’a bey‘ eylediği merkūm Kâmile olduğunu tav‘an ikrâr edip lâkin semen-i mezbûr on bin akçenin ancak dokuz bin akçesini kabz eyledim bin akçesin kabz eylememiş idim deyicek ikrârı mûcebince meblağ-ı mezbûr dokuz bin akçeyi mezkû[r] el-Hâc Yusuf’a edâya tenbîh birle mâ vaka‘a ketb olundu. Fi’l-yevmi’s-sâdis ve’l-ışrîn min Ramazâni’l-mübârek li sene seb‘a ve erba‘în ve elf. Şuhûdü’l-hâl: Abdullah b. Mustafa, Mahmud b. Ahmed, Yakub b. Kurd, Mustafa b. Veli, Ali b. Mustafa, Mustafa Beşe b. Hamza, Mustafa Beşe b. Mehmed, Mustafa b. Ahmed ve gayruhüm.