Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 271 Hüküm no: 326 Orijinal metin no: [52b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hüseyin Beşe b. Abdullah’ın menzilini Hüseyin Beşe’ye sattığı Havâss-ı Aliyye kazâsı müzâfâtından Çatalca nâhiyesine tâbi‘ Nakkāş nâm karye sâkinlerinden Hüseyin Beşe b. Abdullah mahzarında bi’t-tav‘i’s-sâf ikrâr ve i‘tirâf edip karye-i mezbûrede vâki‘ iki tarafdan Mehmed Çelebi mülkü ve bir tarafdan Derviş b. Yusuf mülkü ve bir tarafdan tarîk-i âm ile mahdûd ve mümtâz bir bâb tahtânî beyti ve iki sofayı ve bir bi’r-i mâyı ve muhavvatayı müştemil olup babamdan intikāl eden mülk menzilimi cümle tevâbi‘ ve levâhıkı ile mezbûr Hüseyin [53a] Beşe’ye fıddî nakd-i râyic fi’l-vakt üç bin akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ edip ol dahi vech-i meşrûh üzre iştirâ ve kabûl eyledikden sonra semen-i mezbûr üç bin akçeyi bi’t-tamâm ve’l-kemâl mezbûr Hüseyin Beşe yedinden ahz ve kabz edip teslîm-i mebî‘ eyledim min ba‘d zikr olunan menzil-i mezbûr Hüseyin Beşe’nin mülk-i müşterâsı olmuşdur. Keyfe mâ yeşâ’ ve yahtâr mutasarrıf olsun dedikde mukırr-ı mezbûr Hüseyin Beşe’nin minvâl-i meşrûh üzre cârî olan ikrârını el-mukarru lehü’l-merkūm Hüseyin Beşe bi’l-muvâcehe tasdîk ve tahkīk etmeğin mâ hüve’l-vâki‘ bi’t-taleb ketb olundu. Tahrîren fi’l-yevmi’s-sâbi‘ ve’l-ışrîn min şehri Ramazâni’l-mübârek li sene seb‘a ve erba‘în ve elf. Şuhûdü’l-hâl: Mehmed b. Derviş, Sâlih Beşe b. Receb, Mehmed Beşe b. Abdullah, Ahmed b. Ömer, Ahmed b. Muslihiddin Subaşı, Yakub b. Kurd, Mustafa b. Veli.