Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 272 Hüküm no: 329 Orijinal metin no: [53a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Sâlih Çelebi b. İnayetullah’ın, azatlı kölesi Keyvan b. Abdullah ile aralarında olan alacak davasında sulh olunması Medîne-i Hazret-i Eyyûb el-Ensârî mahallâtından Çavuş Kasım mahallesi sâkinlerinden Sâlih Çelebi b. İnâyetullah meclis-i şer‘-i hatîr-i lâzımü’t-tevkīrde mu‘takı olan işbu hâmilü’l-kitâb Keyvan b. Abdullah mahzarında ikrâr ve takrîr-i kelâm edip mezbûr Keyvan[’a] târih-i kitâbdan beş sene mukaddem mülk dükkânım dâhilinde bir sîm bardak ve ibrik ve beynimizde ma‘lûm ba‘zı eşyâyı dört bin akçeye bey‘ ve teslîm etmiş idim meblağ-ı mezbûru hâlâ taleb eylediğimde beynimizde münâza‘ât-ı kesîre ve muhâsamât-ı adîde vâki‘ olmuşidi el-hâletü hâzihî es-sulhu seyyidü’l-ahkâm muktezâsınca muslihûn tavassut edip mâbeynimizi altı yüz nakd-i râyic fi’l-vakt akçe üzerine sulh eylediklerinde ben dahi sulh-i mezbûru kabûl ve bedel-i sulh olan meblağ-ı mezbûr altı yüz akçeyi mezbûr Keyvan yedinden tamâmen alıp kabz edip husûs-ı mezbûra müte‘allik da‘vâdan mezbûr Keyvan’ın zimmetini bi’l-külliye ibrâ ve iskāt eyledim min ba‘d da‘vâ ve talebim kalmamışdır dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Târihu’l-mezbûr. Şuhûdü’l-hâl: Es-Sâbikūn.