Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 273 Hüküm no: 330 Orijinal metin no: [53a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yorgo v. Yanko’nun Âsım Ahmed Çelebi Vakfı’na olan borcunu dâmâdı Dimo v. Nikola’nın üstlenmesi Havâss-ı Refî‘a kazâsı müzâfâtından Avasya nâm karye sâkinlerinden iken bundan akdem hâlik olan Yorgo v. Nika’nın verâseti sulbiye kebîre kızları Vasilaki ve Marina’ya münhasıra olup kable’l-kısme mezbûre Marina dahi hâlike olup verâseti li ebeveyn karındaşı mezbûre Vasilaki ile zevci Dimo v. Nikola nâm zimmîye münhasıra olduğu mütebeyyin ve dört sehme münkasime olan münâsahaları meselesinden üç sehmi mezbûre Vasilaki’ye müte‘allika olduğu şer‘an mütebeyyin oldukdan sonra mezbûre mahfil-i kazâda işbu bâ‘isü’l-kitâb mezbûr Dimo muvâcehesinde bi’t-tav‘i’s-sâf ikrâr ve i‘tirâf edip hâlik-i merkūm Yorgo’nun merhûm Âsım Ahmed Çelebi vakfı’na zimmetinde edâsı lâzım olan on altı bin nakd-i râyic fi’l-vakt fıddî akçe deyni mukābelesinde bi tarîki’l-istiğlâl rehin olan karye-i mezbûrede vâki‘ bir tarafı Aleksi v. Kozman ve bir tarafı Apostol v. İstemad ve bir tarafı dahi yine mezbûr Aleksi mülkleri ve bir tarafı tarîk-i âm ile mahdûd menzili ve yine karye-i mezbûre sınırında vâki‘ bir tarafı mezbûr Aleksi ve bir tarafı Lamberyo bağları ve bir tarafı tarîk-i âm ve bir tarafı Hekimbaşı [53b] bağı ile mahdûd ve yine bir tarafı mezbûr Aleksi ve bir tarafı mezbûr Lamberyo ve bir tarafı Nikola v. Yorgaki bağları ve bir tarafı tarîk-i âm ile mahdûd ve tahmînen üç dönüm iki kıt‘a bağımı bi tarîki’l-münâsaha şer‘an bize intikāl eyledikde mezbûr Dimo meblağ-ı mezbûr on altı bin akçeyi uhdesine alıp cânib-i vakfa edâya müte‘ahhid oldukdan sonra zikr olunan menzil ve bağlardan bi hükmi’l-münâsaha bana isâbet eden üç sehim hisse-i şâyi‘am mukābelesinde bana dahi dört bin mezbûrü’n-na‘t akçe vermekle ben dahi meblağ-ı mezbûr dört bin akçeyi yedinden bi’t-tamâm ahz ve kabz eyleyip sâlifü’z-zikr menzil ve bağlardan bana isâbet hisse-i şer‘iyyemi mezbûr Dimo’ya ferâgat eyledim min ba‘d zikr olunan menzil ve bağlar mezbûr Dimo’nun ale’l-istiğlâl mülkü olmuşdur. Ba‘de’l-yevm mârrü’z-zikr menzil ve bağlara müte‘allik benden da‘vâ sudûr ederse lede’l-hükkâmi’l-kirâm mesmû‘a ve makbûle olmasın dedikde mukırra-i mezbûre Vasilaki’nin minvâl-i meşrûh üzre cârî ve sâdır olan ikrâr ve i‘tirâfını el-mukarru lehü’l-merkūm Dimo vicâhen tasdîk ve hâlik-i mezbûr Yorgo’nun terekesinden vakf-ı mezbûra edâsı lâzım olan on altı bin akçe deynini mütehammil olup cânib-i vakfa edâya müte‘ahhid olduğunu şifâhen tahkīk etmeğin mâ hüve’l-vâki‘ gıbbe’t-taleb ketb olundu. Fi’l-yevmi’s-sâmin ve’l-ışrîn min Ramazâni’l-mübârek li sene seb‘a ve erba‘în ve elf. Şuhûdü’l-hâl: Receb Efendi b. Abdi, Yakub b. Kurd, Mahmud b. Ahmed, Mustafa b. Ahmed, Nikola v. Yorgaki, Yanaki v. Mitro, Yanaki v. Argiri, Sofyanos v. Apostol, Yorgi v. İstati, İstemad v. Minho, Aleksi v. Turman, Nikola v. Dimitri, Apostol v. İstemad, Dimo v. Todori?