Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 274 Hüküm no: 331 Orijinal metin no: [53b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Şaban b. Abdullah’ın İbrahim b. Abdülgaffar’dan satın aldığı kayığın kusurlu olduğu Peremeci tâifesinden Şaban b. Abdurrahman nâm kimesne mahfil-i kazâya tâife-i mezbûreden İbrahim b. Abdülgaffâr nâm kimesneyi ihzâr ve mahzarında üzerine takrîr-i da‘vâ edip mezbûr İbrahim târih-i kitâbdan on beş gün mukaddem bana altı bin yüz akçeye pereme bey‘ ve teslîm edip ben dahi vech-i meşrûh üzre iştirâ ve tesellüm eylemiş idim hâlâ zikr olunan peremenin oturak tahtası ve bodostama ta‘bîr olunan keresteleri çürük olmağla noksân semen îcâb eder vechile ma‘yûb etmiş, zikr olunan aybı zift setr etmekle iştirâ eylediğim hînde muttali‘ olmayıp hâlâ vâkıf oldum, suâl olunup hıyâr-ı ayb hükmü ile sâlifü’z-zikr peremeyi mezkûr İbrahim’e red etmek matlûbumdur dedikde gıbbe’s-suâl mezbûr İbrahim cevâbında, ayb-ı mezkûr ayb-ı mestûrdur. İsti‘mâl eden kimesneye zararı olmayıp noksân semen îcâb eder ayıb değildir deyicek müdde‘î-i mezbûr Şaban’dan müdde‘âsına mutâbık beyyine taleb olundukda, tâife-i mezbûrenin kethüdâları Ömer b. Mahmud ve Hüseyin b. Bâli nâm kimesneler li ecli’ş-şehâde meclis-i şer‘a hâzırân olup istişhâd olunduklarında, zikr olunan peremeyi müşâhede eyledik gayr-ı mezkûr tâife-i merkūme miyânında noksân semen îcâb eder ayb-ı fâhişdir deyû [bu] husûsa şâhidleriz şehâdet dahi ederiz deyû edâ-i şehâdet-i şer‘iyye eylediklerinde gıbbe ri‘âyeti şerâiti’l-kabûl şehâdetleri hayyiz-i kabûlde vâki‘ olmağın mûcebi ile hükm birle mâ vaka‘a bi’t-taleb ketb olundu. Tahrîren fi’l-yevmi’r-râbi‘ ve’l-ışrîn min Ramazâni’l-mübârek li sene seb‘a ve erba‘în ve elf. Şuhûdü’l-hâl: İbrahim b. Abdullah, Abdülaziz b. ( ), Ali b. Ahmed, Mahmud b. Ahmed, Mustafa b. Veli, Mustafa Beşe, Ali b. Mustafa, Cafer b. Abdullah ve gayruhüm mine’l-hâzırîn.