Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 274 Hüküm no: 332 Orijinal metin no: [53b-2, Arapça] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed b. Veli’nin istiğlâl yoluyla evini el-Hâc Seydi Vakfı’na sattığı Medîne-i Hazret-i Ebî Eyyûb el-Ensârî mahallâtından Zeyneb Hâtun mahallesinde sâkin olan Mehmed b. Veli nâm kimesne meclis-i şer‘-i şerîfde hâzır olup âtiyyü’z-zikr menzilini, el-Hâc Seydi vakfı’na mütevellî olan hâmil-i hâze’l-kitâb Mustafa b. Mehmed’e bey‘ ettiğini ikrâr ve i‘tirâf etti. Mütevellî-i mezbûr da vakf-ı mezbûr malıyla ve istiğlâl maksadıyla, merkūm Mehmed’in işbu akdin kendilerinden sudûruna kadar sâhibi ve mâliki olduğu, elinde ve taht-ı tasarrufunda bulundurduğu mahalle-i merkūmede kâin bulunan bir tarafdan menzil-i mevkūf, diğer tarafdan pınar ve iki tarafdan da tarîk-i âm ile mahdûd cemî‘-i menzilini cümle tevâbi‘ ve levâhıkı ve kâffe-i menâfi‘ ve merâfıkı ile râyicü’l-vakt, altı bin akçe semen-i mu‘ayyen-i makbûzla iştirâ etti. Bâyi‘-i mezbûrun menzili kirâlamak istemesi üzerine mütevellî-i merkūm, ba‘de’t-tahliyye ve’t-tekābuz zeylde mezkûr ayın gurresinden üç sene tamâmına iki bin yedi yüz akçe ücret ile menzil-i mezbûru kirâya verdi. Mütevellî-i mezbûr, vâki‘ ikrârı vicâhen ve şifâhen tasdîk etti. Cerâ zâlike ve hurrire fî gurreti şehri Şevvâli’l-mükerrem sene seb‘a ve erba‘în ve elf. Şuhûdü’l-hâl: Ömer b. Gülâbî, Ahmed b. Zülfikār, Mehmed b. Abdullah, Abdünnebi b. ( ), Cafer b. Abdullah, Şaban Halîfe b. Kenan, Bayram Beşe b. ( ), Mahmud b. Ahmed ve gayruhüm