Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 275 Hüküm no: 333 Orijinal metin no: [54a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed b. Abdullah’ın menzilinin bir kısmını eşi Mânend bt. Bayezid’e sattığı Medîne-i Hazret-i Ebî Eyyûb el-Ensârî mahallâtından Baba Haydar mahallesi sâkinlerinden Mehmed b. Abdullah nâm kimesne meclis-i şer‘-i hatîr-i lâzımü’t-tevkīrde zevcesi işbu hâmiletü’l-kitâb Mânend bt. Bayezid nâm hâtunun mahzarında bi’t-tav‘i’s-sâf ikrâr ve i‘tirâf edip mahalle-i mezbûrede vâki‘ bir tarafdan Hasan b. Abdullah mülkü ve bir tarafdan tarîk-i hâs ve bir tarafdan tarîk-i âm ve bir tarafdan Mehmed b. Emrullah mülkü ile mahdûd menzilden tarîk-i hâs tarafında vâki‘ bir bâb tahtânî beyti ve üstünde çardağı ve beyt-i mezkûrun duvarı dibinde vâki‘ kenîfin nısfını, havlu kapısından tarîkiyle zevcem mezbûre Mânend’e fıddî nakd-i râyic fi’l-vakt iki bin akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm edip ol dahi vech-i meşrûh üzre iştirâ ve kabûl ve tesellüm eyledikden sonra semen-i mezbûr iki bin akçeyi bi’t-tamâm ve’l-kemâl mezbûre Mânend yedinden ahz ve kabz eyledim ba‘de’l-yevm sâlifü’z-zikr menzil, mezbûre Mânend’in mülk-i müşterâsı olmuşdur dedikde mukırr-ı mezbûr Mehmed’in minvâl-i meşrûh üzre cârî olan ikrârı el-mukarru lehâ’l-mezbûre Mânend vicâhen tasdîk ve şifâhen tahkīk edicek mâ vaka‘a bi’t-taleb ketb olundu. Tahrîren fi’l-yevmi’r-râbi‘ min Şevvâli’l-mükerrem li sene seb‘a ve erba‘în ve elf. Şuhûdü’l-hâl: Abdullah Dede b. İsa, Mehmed b. İsa, Halil b. Kasım, Hasan b. Abdullah, Mustafa b. Bekir, Mehmed b. Emrullah, Mahmud b. Ahmed, Ali b. Mustafa.