Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 276 Hüküm no: 334 Orijinal metin no: [54a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hasan b. Abdullah’ın Rıdvan b. Abdullah’ı bıçak ile yaraladığı Havâss-ı Aliyye kazâsı müzâfâtından Yeniköy demekle ma‘rûfe olan karye sâkinlerinden işbu bâ‘isü’l-kitâb Rıdvan b. Abdullah nâm kimesne mahfil-i kazâda Havâss-ı mezbûreye tâbi‘ Cendereci nâm karyeden Hasan b. Abdullah nâm kimesne mahzarında üzerine takrîr-i da‘vâ edip mezbûr Hasan târih-i kitâbdan bir gün mukaddem beyne’s-salâteyn karye-i mezbûre Cendereci’de kendi hâlimde dururken sol kolumun küreği üzerinde soya demekle ma‘rûf bıçak ile urup beni mecrûh eyledi suâl olunup mûcebi icrâ olunmak matlûbumdur dedikde gıbbe’s-suâl mezbûr Hasan cevâbında, müdde‘î-i mezbûr Rıdvan bir nâ-mahrem avrat ile mu‘âmele eder iken görüp zikr olunan soya ile vurdum deyicek merkūm Hasan’ın minvâl-i meşrûh üzre meclis-i şer‘de tav‘an ikrârı hıfzan li’l-makāl gıbbe’t-taleb ketb olundu. Tahrîren fi’l-yevmi’l-hâmis min şehri Şevvâli’l-mükerrem li sene seb‘a ve erba‘în ve elf. Şuhûdü’l-hâl: Mehmed b. Mustafa, Hüseyin b. Hasan, Mustafa b. Mehmed, Hüseyin b. Abdullah, Receb Efendi b. Abdi, Mustafa b. Ali, Mehmed b. ( ), Hüseyin b. Yusuf, Mehmed b. Abdullah ve gayruhüm.