Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 276 Hüküm no: 335 Orijinal metin no: [54a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed b. Ahmed’in menzilini Hasan Bey b. Abdullah’a sattığı Mahmiye-i İstanbul’da Arpaemini mahallesinde sâkin Mehmed b. Ahmed nâm şâbb-ı bâliğ mahfil-i kazâda işbu râfi‘ü’l-kitâb Hasan Bey b. Abdullah mahzarında bi’t-tav‘i’s-sâf ikrâr ve i‘tirâf edip Havâss-ı Refî‘a kazâsı müzâfâtından Küçükçekmece nâhiyesinde vâki‘ bir tarafdan Kenan b. Abdullah mülkü ve iki tarafdan Nazar Çavuş mülkü ve bir tarafdan tarîk-i âm ile mahdûd üç bâb fevkānî ve bir bâb tahtânî odaları ve ahırı ve iki bi’r-i mâyı ve kenîfi ve muhavvata-i zât-ı eşcâr-ı müsmire ve gayr-ı müsmireyi müştemil olup babam müteveffâ-yı mezbûr Ahmed’den irs-i şer‘î ile intikāl eden mülk menzilimi, cümle tevâbi‘ ve levâhıkı ile mezbûr Hasan Bey’e on üç bin beş yüz nakd-i râyic fi’l-vakt akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm edip ol dahi vech-i meşrûh üzre iştirâ ve tesellüm eyledikden sonra semeni olan meblağ-ı mezbûr on üç bin beş yüz akçeyi yedinden tamâmen alıp kabz eyledim ba‘de’l-yevm menzil-i mezbûr merkūm Hasan Bey’in mülk-i müşterâsı olmuşdur. Keyfe mâ yeşâ’ ve yahtâr mutasarrıf olsun dedikde gıbbe’t-tasdîki’ş-şer‘î mâ vaka‘a ketb olundu. Fi’l-yevmi’s-sâdis min Şevvâli’l-mükerrem li sene seb‘a ve erba‘în ve elf. Şuhûdü’l-hâl: İbrahim Efendi el-Emîn, Yahya Ağa el-Cündî, İbrahim b. Abdi, İbrahim Bey teberdâr, Abdurrahman Ağa b. İbrahim Efendi, Nazar Çavuş, Ahmed Ağa, Mustafa Ağa, Ali Çelebi, Ahmed Efendi b. Derviş, Yusuf Ağa b. Abdullah, Ramazan Çelebi, Hacı Hayreddin, Rıdvan b. Abdullah, Mehmed b. Sefer, Ali b. Mustafa ve g[ayruhum].