Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 278 Hüküm no: 338 Orijinal metin no: [54b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Sâliha bt. Hızır’ın menzilini Emine Hatun bt. Abdülvehhab’a sattığı Medîne-i Hazret-i Ebî Eyyûb el-Ensârî -radiye anhu Rabbühü’l-Bârî-mahallâtından Takyecibaşı mahallesinde sâkine Sâliha bt. Hızır Bey nâm hâtun tarafından husûs-ı âti’z-zikri ikrâra vekîl olup hasm-ı şer‘î-i câhid mahzarında mezbûreyi ma‘rifet-i şer‘iyye ile ârifân olan İshak Efendi b. Veli ve Derviş b. Bâli şehâdetleri ile şer‘an vekâleti sâbite olan zevci Rıdvan Bey b. Abdullah nâm kimesne mahfil-i kazâda kıdvetü’l-muhadderât zübdetü’l-muvakkarât, tâcü’l-mestûrât, iklîletü’l-muhassenât, aliyyetü’z-zât safiyyetü’s-sıfât, Âişetü’z-zamân Fâtımatü’l-evân Âişe Sultan -dâmet iffetühâ ve zâdet ismetühâ- hazretlerinin kilercisi olan işbu râfi‘atü’l-kitâb Emine Hâtun bt. Abdülvehhâb tarafından dahi kezâlik menzil-i âti’z-zikri şirâya ve def‘-i semene vekîl olup hasm-ı câhid mahzarında mezbûreyi ma‘rifet-i şer‘iyye ile ârifeyn olan Mustafa Bey b. İsmail el-Cündî ve Musa b. Mehmed şehâdetleri ile vekâleti sâbite olan fahrü’l-akrân Mehmed Ağa b. Ali mahzarında bi’l-vekâle ikrâr ve i‘tirâf edip müvekkile-i mezbûre Sâliha Hâtun mahalle-i mezbûrede vâki‘ bir tarafı çömlekçi Ramazan mülkü ve bir tarafı mekābir-i müslimîn ve bir tarafı tarîk-i hâs ve bir tarafı tarîk-i âm ile mahdû[d] olup, üç bâb fevkānî odaları ve bir sofayı ve altında ahırı ve tahtânî matbahı ve iki bi’r-i mâyı ve fırını ve kenîfi ve muhavvata-i zât-ı eşcâr-ı müsmire ve gayr-ı müsmireyi müştemil olan mülk menzilini, cümle tevâbi‘ ve levâhıkı ile mezbûr Mehmed Ağa’ya seksen yedi bin nakd-i râyic fi’l-vakt fıddî akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm edip ol dahi müvekkilesi mezbûre Emine Hâtun için vech-i muharrer üzre iştirâ ve tesellüm eyledikden sonra semeni olan meblağ-ı merkūm seksen yedi bin akçeyi yedinden tamâmen ahz ve kabz eyledi ba‘de’l-yevm menzil-i mezbûr merkūme Emine Hâtun’un mülk-i müşterâsı olmuşdur, keyfe mâ yeşâ’ ve tahtâr mutasarrıfe olsun dedikde vekîl-i mezbûr Rıdvan Bey’in cemî‘ ikrâr ve i‘tirâfını vekîl-i âhar Mehmed Ağa vicâhen tasdîk ve şifâhen tahkīk etmeğin mâ hüve’l-vâki‘ gıbbe’t-taleb ketb olundu. Fi’l-yevmi’s-sâbi‘ min Şevvâli’l-mükerrem li sene seb‘a ve erba‘în ve elf. Şuhûdü’l-hâl: Hasan Dede b. Ahmed, Receb Çelebi b. Ramazan, Derviş Çelebi b. Bâli, Mustafa b. İsmail, Ahmed Çelebi b. ( ) el-Müezzin, Musa b. Mehmed, el-Hâc Sübhânverdi, Usta Ramazan, Ali b. Mustafa, Muharrirü’l-hurûf Abdülkādir.