Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 278 Hüküm no: 339 Orijinal metin no: [54b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Gazal v. Mardiros’un menzil ve bağlarda olan hissesini İsak v. Mardiros’a sattığı Vilâyet-i Anadolu’da Arapkir sancağında Eğin kasabası sâkinlerinden Gazal v. Mardiros nâm Ermeni mahfil-i kazâda râfi‘-i hâze’l-kitâb İsak v. Mardiros nâm Ermeni muvâcehesinde bi tav‘ihî ikrâr ve i‘tirâf edip kasaba-i mezbûrede vâki‘ bir tarafda Süleyman Bey b. Mirza mülkü ve bir tarafdan Altun v. Kubek nâm Ermeni mülkü ve bir tarafdan mezbûr İsak mülkü ve bir tarafdan Haykon v. Mardiros nâm Ermeni mülkü ile mahdûd bir bâb tahtânî beyti müştemil mülk menzilden ve yine kasaba-i mezbûre hâricinde vâki‘ bir tarafdan Ali Bey b. Haydar Bey nâm cündî bağı ve bir tarafdan mezbûr İsak bağı ve bir tarafdan Agop v. Sefer nâm Ermeni bağı ve taraf-ı râbi‘den hark ile mahdûd bir kıt‘a mülk bağdan mülk-i mevrûsum olan rub‘ hisse-i şer‘iyyemi, mezbûr İsak’a fıddî râyic fi’l-vakt altmış beş aded riyâlî guruşa bey‘-i bâtt-ı sahîh-i şer‘î ve safka-i vâhide ile bey‘ edip ol dahi minvâl-i muharrer üzre iştirâ ve kabûl eyledikden sonra semen-i mezbûr altmış beş aded riyâlî guruşu bi tamâmihî mezbûr İsak yedinden alıp kabz edip zikr olunan menzil ve bağın rub‘unu mahallinde zabt ve tasarrufa mezbûr İsak’ı taslît eyledim dedikde gıbbe’t-tasdîki’ş-şer‘î mâ vaka‘a ketb olundu. Hurrire fi’l-yevmi’s-sâbi‘ min Şevvâli’l-mükerrem li sene seb‘a ve erba‘în ve elf. Mine’l-hicreti men lehü’l-izzü ve’ş-şeref. Şuhûdü’l-hâl: Mehmed b. Abdullah, Hasan b. Abdullah, Cafer b. Uğurlu, Haçok v. Yakob, Yano v. Kanuk, Agya v. Serkis, Emar? v. Haçador, Argos v. Varin ve gayruhüm.