Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 279 Hüküm no: 340 Orijinal metin no: [55a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Perebye bt. Manol’ün Hızır Paşa Vakfı mütevellisine olan borcuna karşılık bazı eşyalarını rehin verdiği Medîne-i Kostantıniyye hısnı ebvâbından Eğrikapı dâhilinde Avcıbey mahallesi sâkinlerinden Perebye bt. Manol nâm Nasrâniye meclis-i şer‘de, medîne-i Eyüb’de vâki‘ merhûm Cafer Paşa vakfı’na bi’l-fi‘l mütevellî olan Mehmed Beşe b. Hamza muvâcehesinde ikrâr-ı tâm ve ta‘bîr ani’l-merâm edip vakf-ı mezbûr malından asâlet cihetinden ve ba‘zı kimesneler kefâlet cihetinden zimmetimde edâsı lâzım otuz üç bin dört yüz akçe ve târih-i kitâba gelince atîk ve cedîd deynden dahi altı bin elli iki ki cem‘an otuz dokuz bin dört yüz elli akçe deynimiz olup mukābelesinde iki meneviş çakşır ve bir serâser zıbın ve bir mâî dolama ve bir altun eğinlik ve bir kırmızı atlas zenne kaftan ve sekiz zirâ‘ al hatâyî ve üç gömlek ve bir sırmalı kolan kuşak ve on beş paftalı bir sîm kolan kuşak ve bir çatma döşek yüzü ve yüz on sekiz dirhem bir sîm kuşak ve iki münakkaş makrama ve otuz iki paftalı bir sîm kuşak ve yine yüz dirhem bir sîm kuşak ve bir meneviş çuka yelek ve bir çatma yasdık ve altı ayaklı iki altın küpe ve bir yeşil ibrişim tor kuşak ve on beş zirâ‘ keten bezi ve bir münakkaş uçkur ve bir tülbent kuşak ve bir dârâyî çintiyân ve yüz yirmi dirhem bir sîm maşraba ve iki kırmızı çuka yelek ve seksen dirhem bir sîm kuşak ve bir mâî çuka yelek ve bir mor yelek ve iki serâser yasdık ve altı bir paftalı iki sîm kuşak ve bir kahve rengi çuka kürdiye ve bir top keten bezi ve bir münakkaş bohça ve bir hünkârî tâbi‘ kaftan ve sırmalı kolan kuşak ve bir sîm kadeh ve doksan dirhem iki sîm kuşak ve on beş paftalı bir sîm kuşak ve bir meneviş çuka ferâceyi vakf-ı mezbûr mütevellîsi olan merkūma Mehmed Beşe yedinde rehin vaz‘ etmiş idim meblağ-ı mezbûr otuz dokuz bin dört yüz elli akçeyi târih-i kitâbdan otuz gün tamâmına değin mütevellî-i mezbûr Mehmed Beşe’ye edâ etmez isem, işbu hâzır bi’l-meclis olan Abdullah Çelebi b. İbrahim nâm kimesneyi mütevellî-i mezbûr yedinde rehin vaz‘ eylediğim eşyâ-i mezkûreyi semen-i misli ile bey‘, semeninden mâl-ı vakfı edâya azl ve in‘izâlden masûne "küllemâ azeltüke fe-ente vekîlî" mefhûmu üzre vekâlet-i devriye ile vekîl nasb eyledim dedikde mütevellî-i mezbûr Mehmed beşe mezbûre Perebye’yi cemî‘ ikrâr-ı meşrûhunda bi’l-muvâcehe tasdîk ettikden sonra mezbûr Abdullah Çelebi dahi vekâlet-i merkūmeyi kabûl ve hizmet-i lâzımesin edâya müte‘ahhid olmağın, mâ hüve’l-vâki‘ gıbbe’t-taleb ketb olundu. Tahrîren fi’l-yevmi’l-hâmis min Şevvâli’l-mükerrem li sene seb‘a ve erba‘în ve elf. Şuhûdü’l-hâl: Abdurrahman Efendi b. Cafer, Yusuf Beşe b. Mehmed, Mahmud b. Ahmed, Yakub [b.] Kurt, Ali b. Mustafa, Mustafa Beşe b. Mahmud, Cafer b. Osman, Mustafa b. Mehmed, Mustafa b. Veli ve gayruhüm.