Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 281 Hüküm no: 342 Orijinal metin no: [55a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Musa Beşe b. Hamza’nın boşadığı eşi Marziye bt. Mustafa’nın zimmetini ibra ettiği Havâss-ı Refî‘a kazâsı müzâfâtından Hasköy mahallâtından Pîrî Paşa mahallesi sâkinlerinden Musa Beşe b. Hamza nâm gemici mahfil-i kazâda zevce-i mutallakası işbu bâ‘isetü’l-kitâb Marziye bt. Mustafa nâm hâtun mahzarında ikrâr-ı tâm ve takrîr-i kelâm edip bundan akdem mezbûre Marziye’ye taht-ı nikâhımda iken on sekiz bin nakd-i râyic fi’l-vakt fıddî akçe hıfz etmek için def‘ ve teslîm edip ol dahi kabz ve teslîm eylemişidi hâlâ beynimizde müfârakat vâki‘ oldukda, meblağ-ı mezbûru Marziye’den da‘vâ ve taleb eylediğimde kendine ve bana ve evlâdımıza ba‘zı esvâb eyleyip harc [ve] sarf eyledik deyû cevâb vermekle ben dahi terk eyleyip meblağ-ı mezbûra müte‘allik da‘vâdan mezbûre Marziye’nin zimmetini ibrâ-i âmm-ı kātı‘ü’n-nizâ‘ ile ibrâ ve iskāt eyledim dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Tahrîren fi’l-yevmi’s-sâbi‘ min Şevvâli’l-mükerrem li sene seb‘a ve erba‘în ve elf. Şuhûdü’l-hâl: Şaban b. ( ), Hüseyin Bey b. ( ), Mehmed Çelebi b. ( ) el-Müezzin, Halil b. Mustafa, Ali b. Abdullah, Mustafa b. Veli, Cafer b. Abdullah ve gayruhüm.