Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 281 Hüküm no: 343 Orijinal metin no: [55b-1, Arapça] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Bahri Hatun bt. Abdullah’ın istiğlâl yoluyla evini Camcı Ahmed Bey Vakfı’na sattığı Medîne-i Hazret-i Ebî Eyyûb el-Ensârî -radiye anhu Rabbühü’l-Bârî-mahallâtından Câmi‘-i Atîk mahallesinde sâkine olan Bahri Hâtun bt. Abdullah nâm zevcesi kıbelinden âtiyyü’z-zikr menzilin bey‘ ikrârına ve istîcârına vekâleti Kasımpaşa câmi‘i hatîbi Mehmed Efendi b. Mahmud ve Nişancı Paşa câmi‘i hatîbi Mahmud Efendi b. Mehmed nâm kimesnelerin şehâdetleri ile sâbit olan fahrü’l-kuzât Hasan Efendi b. Abdülmecid meclis-i şer‘-i şerîfde hâzır olup müvekkile-i mezbûresinin âtiyyü’l-beyân menzilini, medîne-i mezbûrede vâki‘ merhûm Camcı Ahmed Bey vakfı’na mütevellî olan hâmil-i hâze’l-kitâb Mustafa Çelebi b. Mehmed’e bey‘ ettiğini ikrâr ve i‘tirâf etti. Mütevellî-i mezbûr da vakf-ı mezbûr malıyla ve istiğlâl maksadıyla müvekkile-i mezbûrenin işbu akdin kendilerinden sudûruna kadar sâhibi ve mâliki olduğu, elinde ve taht-ı tasarrufunda bulundurduğu mahalle-i merkūmede kâin bulunan bir tarafdan Mustafa Beşe b. Veli mülkü, diğer tarafdan Hüseyin Çelebi b. Mustafa mülkü ve iki tarafdan da tarîk-i hâs ile mahdûd cemî‘-i menzilini cümle tevâbi‘ ve levâhıkı ve kâffe-i menâfi‘ ve merâfıkı ile râyicü’l-vakt, on bin akçe semen-i mu‘ayyen-i makbûzla iştirâ etti. Bâyi‘a-i mezbûrenin menzili kirâlamak istemesi üzerine mütevellî-i merkūm, ba‘de’t-tahliyye ve’t-tekābuz zeylde mezkûr târihden bir sene tamâmına iki bin akçe ücret ile menzil-i mezbûru kirâya verdi. Mütevellî-i mezbûr, vâki‘ ikrârı vicâhen ve şifâhen tasdîk etti. Sonra mukırra-i mezbûrenin oğlu Mehmed Efendi b. merhûm Şeyh Mahmud, menzil-i mezbûrun derkine ve ücret-i merkūmeye îcâb ve kabûlü hâvî kefâletle kefîl oldu. Cerâ zâlike ve hurrire fi’l-yevmi’s-sâmin min Şevvâli’l-mükerrem sene seb‘a ve erba‘în ve elf. Şuhûdü’l-hâl: Mehmed Efendi b. Şaban, Şaban Halîfe b. Kenan, Mustafa Çelebi b. Veli, Hasan b. Kaya, Piyâle Bey b. Abdullah, Kasım Çelebi b. Abdullah