Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 282 Hüküm no: 344 Orijinal metin no: [55b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ali Çavuş b. Abdülbâki’nin satın aldığı kölenin sahibi çıktığından parasını geri aldığı Vilâyet-i Rumeli’nde Çorlu kazâsına tâbi‘ Öksüzköy demekle ma‘rûfe karye sâkinlerinden fahrü’l-cüyûş Ali Çavuş b. Abdülbâkī Çavuş meclis-i şer‘-i hatîr-i lâzımü’t-tevkīrde bin kırk altı senesinde Vize ve Kırkkilise sancaklarında beytülmâl ve yava ve kaçkın ve mâl-ı gāib emîni olan işbu hâmilü’l-kitâb İbrahim Çavuş b. Kurd mahzarında ikrâr ve takrîr-i kelâm edip mezbûr İbrahim Çavuş târih-i kitâbdan üç ay mukaddem sarışın kasîrü’l-kāme Rûsiyyü’l-asl Kaytas b. Abdullah nâm memlûk gulâmı yava ahz olunup müddet-i örfiyyesi tamâm olmuşdur deyû altı bin akçe ile bin beş yüz akçe kıymetli bir re’s kır bârgire bana bey‘ ve teslîm edip ben dahi vech-i meşrûh üzre iştirâ ve tesellüm etmiş idim mahmiye-i Kostantıniyye mahallâtından Dırağman mahallesinde sâkin Zülfikār Çavuş nâm kimesne sâlifü’z-zikr gulâma müstahık çıkıp şer‘an isbât edip yedimden ahz etmekle ben dahi mezbûr İbrahim Çavuş’a mürâca‘at edip meblağ-ı mezbûr altı bin akçeyi mezbûr İbrahim Çavuş yedinden tamâmen alıp kabz eyledim dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Tahrîren fi’l-yevmi’s-sâbi‘ ve’l-ışrîn min şehr-i Ramazâni’l-mübârek li sene seb‘a ve erba‘în ve elf. Şuhûdü’l-hâl: Mustafa b. Ahmed, Mahmud b. Ahmed, Mustafa b. Veli, Cafer b. Abdullah, Ali b. Mustafa, Abdullah b. Mustafa, Mustafa Bey b. Mahmud.