Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 282 Hüküm no: 345 Orijinal metin no: [55b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Pavli v. Kopi’nin bağını Duka v. Yorgo’ya sattığı Vilâyet-i Rumeli’nde Ergirikasrı kazâsına tâbi‘ Merzoviçeni nâm karye sâkinlerinden Pavli v. Kopi nâm zimmî meclis-i şer‘-i hatîr-i lâzımü’t-tevkīrde işbu hâmilü’s-sifr Duka v. Yorgo nâm zimmî muvâcehesinde bi’t-tav‘i’s-sâf ikrâr ve i‘tirâf edip karye-i mezbûre sınırında vâki‘ bir tarafdan İslâm Bey bağı ve bir tarafdan Yani [v.] Şirin bağı ve bir tarafdan diğer Yani v. Hristo bağı ve bir tarafdan tarîk-i âm ile mahdûd tahmînen bir dönüm mülk bağımı mezbûr Duka’ya fıddî nakd-i râyic fi’l-vakt iki bin dört yüz akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ edip ol dahi vech-i meşrûh üzre iştirâ ve kabûl eyledikden sonra semen-i mezbûr iki bin dört yüz akçeyi bi’t-tamâm ve’l-kemâl mezbûr Duka yedinden ahz ve kabz edip mebî‘-i mezbûru mahallinde zabt ve tasarrufa müşterî-i mezbûr Duka’yı taslît eyledim ba‘de’l-yevm zikr olunan bağ-ı mezbûr Duka’nın mülk-i müşterâsı olmuşdur dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Tahrîren fi’l-yevmi’t-tâsi‘ min Şevvâli’l-mükerrem li sene seb‘a ve erba‘în ve elf. Şuhûdü’l-hâl: Mahmud b. Ahmed, Ali b. Mustafa, Mustafa b. Ahmed, Cafer b. Abdullah, Yorgo v. Somo, Kiti v. Yorgi, Yorgo v. Yani, Yani v. Yorgaki, Yorgo [v.] Dimo, Yorgi v. Yani, Pasko v. Dido.