Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 283 Hüküm no: 347 Orijinal metin no: [56a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hasan b. Abdullah’ın müşterek tasarrufundaki bağ, menzil ve tarla hisselerini eşi Sâliha bt. Mahmud’a sattığı Mahmiye-i İstanbul’da Nalband mahallesinde sâkin Hasan b. Abdullah nâm kimesne mahfil-i kazâda işbu râfi‘ü’l-kitâb Sâliha Hâtun bt. Mahmud mahzarında bi’t-tav‘i’s-sâf ikrâr ve i‘tirâf edip Havâss-ı Refî‘a kazâsı müzâfâtından Terkos nâhiyesine tâbi‘ Azadlı nâm karyede vâki‘ mukaddemâ mezbûre Sâliha Hâtun ile ale’l-iştirâki’s-seviy iştirâ eylediğimiz çiftlik ta‘bîr olunur iki tarafı Hüseyin Bey mülkü ve iki tarafı tarîk-i âm ile mahdûd bir bâb tahtânî beyti ve fırını ve su kuyusunu ve ahırı ve muhavvata-i zât-ı eşcâr-ı müsmire ve gayr-ı müsmireyi müştemil olan menzilden ve yine karye-i merkūme kurbunda vâki‘ bir tarafı Eşref Çelebi mülkü ve iki tarafı sâbıkan Rumeli kazaskeri olan a‘lemü’l-ulemâ’i’l-izâm Ebûsaid Mehmed Efendi mülkü ve bir tarafı Hüseyin Bey mülkü ve bir tarafı tarîk-i âm ile mahdûd tahmînen bir dönüm bağdan nısf-ı şâyi‘imi, mezbûre Sâliha Hâtun’a dokuz bin nakd-i râyic fi’l-vakt fıddî akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ve safka-i vâhide ile bey‘ ve teslîm edip ol dahi vech-i muharrer üzre iştirâ ve tesellüm eyledikden sonra yine merkūme Sâliha Hâtun ile ale’s-seviyye tefevvuz eylediğimiz karye-i mezbûre sınırında mevâzi‘-i müteferrikada vâki‘ merhûm Sultan Bayezid-i Velî -tâbe serâhû- hazretlerinin evkāfından tahmînen iki müd tohum istî‘âb eder yedi kıt‘a tarlalardan dahi nısf-ı şâyi‘imin hakk-ı tasarrufunu, evkāf-ı mezbûr mütevellîsi ma‘rifetiyle iki bin mezbûrü’n-na‘t akçe mukābelesinde tefvîz edip ol dahi vech-i meşrûh üzre tefevvuz ve kabûl eyledikden sonra mukābelesinde olan meblağ-ı merkūm ile zikr olunan menzil ve bağın semeni olan meblağ ki cem‘an on bir bin akçenin on bin akçesini mezbûre Sâliha Hâtun’a cihet-i karz-ı şer‘îden zimmetimde edâsı lâzım olan on bin akçe deynime takās edip bâkī bin akçesini yedinden bi’t-tamâm ve’l-kemâl ahz ve kabz eyledim ba‘de’l-yevm sâlifü’z-zikr menzil ve bağın cümlesi mezbûre Sâliha’nın mülk-i müşterâsı ve mezâri‘-i merkūmenin dahi mecmû‘u dâhil-i taht-ı tasarrufu olmuşdur dedikde gıbbe’t-tasdîki’ş-şer‘iyyi vicâhen mâ vaka‘a bi’t-taleb ketb olundu. Fi’l-yevmi’s-sâmin min Şevvâli’l-mükerrem li sene seb‘a ve erba‘în ve elf. Şuhûdü’l-hâl: Yusuf Efendi b. el-İmâm, Abdi Bey b. ( ) es-Sarrâcü’s-sultânî, Mehmed Çelebi b. İshak es-Sarrâcü’s-sultânî, Yusuf b. Abdullah, Mustafa b. Mehmed, Receb Efendi b. Abdi, Mahmud b. Ahmed, Ali b. Abdullah, Mustafa Çelebi b. Veli, Yakub b. Kurd, Fahrü’l-hurûf Abdülkādir Çelebi.