Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 284 Hüküm no: 348 Orijinal metin no: [56a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Çelebi b. Veli’nin menzilini Ömer b. Gülâbi’ye sattığı Medîne-i Hazret-i Ebî Eyyûb el-Ensârî -radiye anhu Rabbühü’l-Bârî-mahallâtından Zeyneb Hâtun mahallesi sâkinlerinden Mehmed Çelebi b. Veli nâm kimesne meclis-i şer‘-i hatîrü’l-lâzımü’t-tevkīrde işbu hâmilü’l-kitâb Ömer b. Gülâbî nâm kimesne mahzarında bi’t-tav‘i’s-sâf ikrâr ve i‘tirâf edip mahalle-i mezbûrede vâki‘ bir tarafdan Debbâğ Mehmed mülkü ve bir tarafdan Parmaklı kuyu ve iki tarafdan tarîk-i âm ile mahdûd iki bâb tahtânî beyti ve ahırı ve bi’r-i mâyı ve kenîfi ve eşcâr-ı müsmire ve gayr-ı müsmireyi müştemil mülk menzilimi, cümle tevâbi‘ ve levâhık ile Ömer’e fıddî nakd-i râyic fi’l-vakt yedi bin altı yüz akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm edip ol dahi vech-i meşrûh üzre iştirâ ve kabûl ve tesellüm eyledikden sonra semen-i mezbûr yedi bin altı yüz akçeyi bi’t-tamâm ve’l-kemâl ahz ve kabz eyledim ba‘de’l-yevm zikr olunan zikr olunan menzil-i mezbûr Ömer’in mülk-i müşterâsı olmuşdur. Keyfe mâ yeşâ’ ve yahtâr mutasarrıf olsun dedikde mukırr-ı mezbûr Mehmed Çelebi’nin minvâl-i meşrûh üzre cârî olan ikrârını el-mukarru lehü’l-mezbûr Ömer bi’l-muvâcehe tasdîk ve bi’l-müşâfehe tahkīk etmeğin mâ vaka‘a bi’t-taleb ketb olundu. Tahrîren fi’l-yevmi’t-tâsi‘ min Şevvâli’l-mükerrem li sene seb‘a ve erba‘în ve elf. Şuhûdü’l-hâl: Mustafa Halîfe b. Ali el-İmâm, Mustafa b. Mehmed, Mehmed Çelebi b. Hasan, Ahmed b. Receb, Mehmed b. Veli, Hüseyin Efendi b. Mehmed el-İmâm, Mahmud b. Ahmed ve gayruhüm.