Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 285 Hüküm no: 349 Orijinal metin no: [56a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kiro v. Yani’nin bağını Yorgo v. Niko’ya sattığı Vilâyet-i Rumeli’nde Mazaraki kazâsına tâbi‘ Plaşviçe nâm karye sâkinlerinden Kiro v. Yani nâm zimmî meclis-i şer‘-i hatîr-i lâzımü’t-tevkīrde işbu hâmilü’s-sifr Yorgo v. Niko nâm zimmî muvâcehesinde bi’t-tav‘i’s-sâf ikrâr ve i‘tirâf edip karye-i mezbûrenin sınırında vâki‘ bir tarafdan Yani v. Ceva bağı ve bir tarafdan Dimo v. Şirini bağı ve bir tarafdan Yani v. Kosta bağı ve bir tarafdan tarîk-i âm ile mahdûd tahmînen altı çapalık mülk bağımı cümle tevâbi‘ ve levâhıkı ile mezbûr Yorgo’ya fıddî nakd-i râyic fi’l-vakt iki bin akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ edip ol dahi vech-i meşrûh üzre iştirâ ve kabûl eyledikden sonra semen-i mezbûr iki bin akçeyi bi’t-tamâm ve’l-kemâl mezbûr Yorgo yedinden alıp kabz edip mebî‘-i mezbûru mahallinde zabt ve tasarrufa müşterî-i mezbûr Yorgo’yu taslît eyledim ba‘de’l-yevm zikr olunan bağı mezbûr Yorgo’nun mülk-i müşterâsı olmuşdur dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Tahrîren fi’l-yevmi’l-âşir min Şevvâli’l-mükerrem li sene seb‘a ve erba‘în ve elf. Şuhûdü’l-hâl: Mahmud b. Ahmed, Ali b. Mustafa, Mustafa b. Veli, Yakub b. Kurd, Moço v. İstefano, Nikola v. Yani, Nikola v. Makri, Yani [v.] Dimo, Koço v. Karini, Dimo v. Kosta, Yani [v.] Yorgaki, Nikola [v.] Lahna? ve g[ayruhum].