Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 286 Hüküm no: 351 Orijinal metin no: [56b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed b. Abdullah’ın Mehmed Beşe b. Abdullah’a borçlu olduğu Havâss-ı Aliyye kazâsı müzâfâtından Çatalca nâhiyesine tâbi‘ Oklağalı nâm karye sâkinlerinden Mehmed b. Abdullah nâm kimesne mahfil-i kazâda işbu hâmilü’l-kitâb Mehmed Beşe b. Abdullah mahzarında bi tav‘ihî ikrâr ve takrîr-i kelâm edip mezbûr Mehmed Beşe’den târih-i kitâbdan otuz gün mukaddem iki bin altı yüz akçeye iki re’s su sığırı öküzü iştirâ ve kabz eyledim meblağ-ı mezbûr hâlâ zimmetimde lâzımü’l-edâ ve vâcibü’l-kazâ deynimdir dedikde meblağ-ı mezbûr iki bin altı yüz akçeye karye-i mezbûre sâkinlerinden Yorgi v. Kiryaki nâm zimmî tarafından emr ve kabûlü hâviye kefâlet ile kefîl bi’l-mâl olmağın mâ vaka‘a bi’t-taleb ketb olundu. Tahrîren fi’l-yevmi’l-hâdî min Şevvâli’l-mükerrem li sene seb‘a ve erba‘în ve elf. Şuhûdü’l-hâl: Receb Efendi b. Abdi, Mehmed Efendi b. Hasan el-Kadı, Mehmed b. Hasan, Ali b. Mustafa, Mahmud b. Ahmed, Ali b. Mustafa, Cafer b. Abdullah.