Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 286 Hüküm no: 352 Orijinal metin no: [56b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Aleksi v. Andriye’nin tarlasını Mehmed Beşe b. Hasan’a sattığı Havâss-ı Aliyye kazâsı müzâfâtından Küçükçekmece nâhiyesine tâbi‘ Ayastefanos nâm karye sâkinlerinden Aleksi v. Andriye nâm zimmî mahfil-i kazâda işbu bâ‘isü’l-kitâb Mehmed Beşe b. Hasan nâm râcil mahzarında ikrâr-ı tâm ve takrîr-i kelâm edip karye-i merkūme sınırında vâki‘ bir tarafdan Arslan nâm zimmî tarlası ve bir tarafdan Papa Tolko tarlası ve bir tarafı Papa Velisari tarlası ve bir tarafdan tarîk-i âm ile mahdûd merhûm ve mağfûrun-leh Sultan Bayezid Hân vakfı’ndan beş keyl tohum istî‘âb eder Patrik Bağı demekle ma‘rûf mutasarrıf olduğum bir kıt‘a tarlamın ve yine bir tarafı müslim tarlası ve bir tarafı mezbûr Arslan tarlası ve bir tarafı Kosta tarlası ve bir tarafı Manol zimmî tarlası ile mahdûd ve yine merhûm-ı mûmâ-ileyh evkāfı arâzisinden mutasarrıf olduğum bir keyl tohum istî‘âb eder bir kıt‘a tarlamın dahi hakk-ı tasarruflarını evkāf-ı mezbûre mütevellîsi ma‘rifetiyle mezbûr Mehmed Beşe’ye üç bin nakd-i râyic fi’l-vakt fıddî akçe mukābelesinde tefvîz edip ol dahi vech-i muharrer üzre tefevvuz ve kabûl eyledikden sonra bedel-i tefvîz olan meblağ-ı merkūm üç bin akçeyi yedinden bi’t-tamâm ve’l-kemâl ahz ve kabz eyledim ba‘de’l-yevm zikr olunan tarlalar mezbûr Mehmed Beşe’nin dâhil-i taht-ı tasarrufu olmuşdur dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’l-âşir min Şevvâli’l-mükerrem li sene seb‘a ve erba‘în ve elf. Şuhûdü’l-hâl: Ramazan Çelebi b. Mehmed, Mustafa b. Mehmed, Mustafa b. Abdi, Mustafa b. Durmuş, Ali b. Mustafa, Yakub b. Kurd, Receb Efendi b. Abdi, Mahmud b. Ahmed.