Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 287 Hüküm no: 353 Orijinal metin no: [56b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Nikola v. Vero’nun Nikola v. Kiro’daki alacağının ödenmesi Zimmî tâifesinden Nikola [v.] Vero nâm Nasrânî mahfil-i kazâda işbu bâ‘isü’l-kitâb diğer Nikola v. Kiro nâm zimmî muvâcehesinde üzerine takrîr-i da‘vâ edip mezbûr diğer Nikola ile târih-i kitâbdan bir buçuk sene mukaddem bostancılık san‘atında akd-i şirket eyleyip mezbûra bin dört yüz nakd-i râcî fi’l-vakt fıddî akçe sermâye vermişdim hâlâ fesh-i şirket eylediğimizde beynimizde cârî olan mu‘âmelât hesâb ve kitâb olunup şirketden olan mahsûlü beynimizde taksîm eyleyip meblağ-ı mezbûr zimmetinde kalmışidi suâl olunup teslîmine tenbîh olunması matlûbumdur dedikde gıbbe’s-suâl mezbûr diğer Nikola meblağ-ı merkūm bin dört yüz akçeyi müdde‘î-i mezbûr Nikola gāib ani’l-meclis Davud Paşa bahçesi bekçisine zimmetinde edâsı lâzım bin dört yüz akçe deyni için benden havâle-i şer‘iyye ile havâle etmeğin ben dahi zikr olunan havâleyi kabûl edip meblağ-ı mezbûru merkūm bekçiye edâ ve teslîm eyledim deyû cevâb vericek gıbbe’l-istintâk ve akībe’l-inkâr merkūm diğer Nikola’dan takrîrine mutâbık beyyine taleb olundukda udûlden Hamza b. Ali nâm kimesne ile Zoto v. Koniş ve Kira v. Papas nâm zimmîler meclis-i şerî‘at-nihâda li ecli’ş-şehâde hâzırûn olup istişhâd olunduklarında fi’l-hakīka müdde‘î-i merkūm Nikola meblağ-ı merkūm bin dört yüz akçeyi Davudpaşa bahçesi bekçisine zimmetinde edâsı lâzım olan bin dört yüz akçe deyni için müsteşhid-i merkūm diğer Nikola’dan bizim huzûrumuzda havâle-i şer‘iyye ile havâle edip ol dahi zikr olunan havâleyi kabûl eyledikden sonra meblağ-ı mezbûru merkūm bekçiye edâ ve teslîm eyledi biz bu husûsa şâhidleriz şehâdet dahi ederiz deyû edâ-i şehâdet-i şer‘iyye eylediklerinde ba‘de’t-ta‘dîl ve’t-tezkiyye şehâdetleri makbûle olmağın mâ hüve’l-vâki‘ bi’t-taleb ketb olundu. Fi’l-yevmi’s-sâmin min Şevvâli’l-mükerrem li sene seb‘a ve erba‘în ve elf. Şuhûdü’l-hâl: Mustafa b. Ahmed, Mahmud b. Ahmed, Mustafa b. Veli, Ali b. Abdullah, Yakub b. Kurd, Cafer b. Abd[ullah].