Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 288 Hüküm no: 355 Orijinal metin no: [57a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Aleksa v. İlya’nın bostan yerini Mihal v. Rayko’ya sattığı Havâss-ı Aliyye kazâsı müzâfâtından Terkos nâhiyesine tâbi‘ Boğaz nâm karye sükkânından Aleksa v. İlya nâm zimmî mahfil-i kazâda râfi‘-i hâze’l-kitâb Mihal v. Rayko nâm zimmî muvâcehesinde bi tav‘ihî ikrâr ve i‘tirâf edip işbu akdin sudûruna değin silk-i mülk-i sahîhimde münselik olup karye-i mezbûrede vâki‘ bir tarafdan Nikola v. Roc nâm zimmî mülkü ve bir tarafdan Simo v. ( ) nâm zimmî mülkü ve bir tarafdan tarîk-i âm ve bir tarafdan tarîk-i hâs ile mahdûd bir kıt‘a mülk bostan yerimi, mezbûr Mihal’e fıddî nakd-i râyic fi’l-vakt iki bin iki yüz akçeye bey‘-i bâtt-ı sahîh-i şer‘î ile bey‘ edip ol dahi minvâl-i muharrer üzre iştirâ ve tesellüm eylediklerinden sonra semen-i mezbûr iki bin iki yüz akçeyi bi tamâmihî yedinden ahz ve kabz eyledim ba‘de’l-yevm zikr olunan bostan yeri mezbûr Mihal’in mülk-i müşterâsı olmuşdur dedikde gıbbe’t-tasdîki’ş-şer‘î mâ vaka‘a ketb olundu. Hurrire fi’l-yevmi’s-sâlis aşer min Şevvâli’l-mükerrem li sene seb‘a ve erba‘în ve elf. Şuhûdü’l-hâl: Mahmud b. Ahmed, Ali b. Abdullah, Mustafa b. Veli, Yani v. Yorgi, Kosta v. Todori, Şilo v. Nikola.