Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 289 Hüküm no: 356 Orijinal metin no: [57a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hüseyin Çavuş b. Ahmed’in menzilini Yorgi v. Mihal’e sattığı Mahmiye-i Kostantıniyye mahallâtından Tercüman Yunus mahallesi sükkânından Hüseyin Çavuş b. Ahmed mahfil-i kazâda râfi‘-i hâze’l-kitâb Yorgi v. Mihal nâm zimmî muvâcehesinde bi tav‘ihî ikrâr ve i‘tirâf edip Havâss-ı Refî‘a kazâsı müzâfâtından Çatalca nâhiyesine tâbi‘ Oklağī nâm karyede vâki‘ bir tarafı Kiti nâm zimmî mülkü ve bir tarafı Oskelini nâm zimmî mülkü ve bir tarafı Dimitri nâm zimmî mülkü ve taraf-ı râbi‘den tarîk-i âm ile mahdûd bir bâb fevkānî odayı ve sofayı ve altında bir bâb tahtânî odayı ve muhavvatayı müştemil olup mukaddemâ mezbûr Yorgi’nin ve anası Marola bt. Yani’den ve halası Hafrandero bt. Yani’den iştirâ eylediğim mülk menzilimi, mezbûr Yorgi’ye fıddî nakd-i râyic fi’l-vakt beş bin beş yüz akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm, ol dahi minvâl-i muharrer üzre iştirâ ve tesellüm eyledikden sonra meblağ-ı mezbûr beş bin beş yüz akçeyi bi tamâmihî mezbûr Yorgi yedinden alıp kabz eyledim ba‘de’l-yevm menzil-i mahdûd-ı merkūm Yorgi’nin mülk-i müşterâsı olmuşdur dedikde gıbbe’t-tasdîki’ş-şer‘î mâ vaka‘a ketb olundu. Fi’l-yevmi’l-âşir min Şevvâli’l-mükerrem li sene seb‘a ve erba‘în ve elf. Şuhûdü’l-hâl: Mustafa Beşe b. İsa, Mustafa b. Mahmud, Ali b. Mustafa, Mahmud b. Ahmed, Cafer b. Abd[ullah].