Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 289 Hüküm no: 357 Orijinal metin no: [57a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yorgi v. Mihal’in menzil ve tarlalarını Aleksi v. Yani’ye sattığı Havâss-ı Refî‘a kazâsı müzâfâtından Çatalca nâhiyesine tâbi‘ Oklağī nâm karye sükkânından Yorgi v. Mihal nâm zimmî mahfil-i kazâda râfi‘-i hâze’l-kitâb Aleksi v. Yani nâm zimmî muvâcehesinde bi tav‘ihî ikrâr ve i‘tirâf edip karye-i mezbûrede vâki‘ bir tarafdan Kiti nâm zimmî mülkü ve bir tarafdan Oskelini nâm zimmî mülkü ve bir tarafdan Dimitri nâm zimmî mülkü ve taraf-ı râbi‘den tarîk-i âm ile mahdûd bir bâb fevkānî odayı ve bir sofayı ve altında bir bâb tahtânî odayı ve muhavvatayı müştemil olup bundan akdem Hüseyin Çavuş nâm kimesneden iştirâ eylediğim mülk menzilimi, mezbûr Aleksi’ye fıddî nakd-i râyic fi’l-vakt kırk beş bin akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm ol dahi vech-i muharrer üzre iştirâ ve tesellüm eyledikden sonra yine karye-i mezbûre hudûdu dâhilinde vâki‘ işbu tefvîz-i sudûruna değin taht-ı tasarrufumda olup bir tarafdan Yaycı oğlu Mustafa Çelebi nâm kimesne mülkü ve bir tarafdan değirmenci Yani nâm zimmî çayırı ve bir tarafdan Nikola v. Melboni nâm zimmî çayırı ve taraf-ı râbi‘den tarîk-i âm ile mahdûd merhûm ve mağfûrun-leh Sultan Bayezid Hân -tâbe serâhû- evkāf-ı şerîfesinden olup [57b] cânib-i vakf-ı mezbûra beher sene yirmi beş akçe mukāta‘ası olan bir kıt‘a çayırın hakk-ı tasarrufunu, beş bin akçe bedel-i tefvîz ve sâhib-i arz ma‘rifetiyle mezbûr Aleksi’ye tefvîz edip ol dahi vech-i muharrer üzre tefevvuz ve kabûl eyledikden sonra semen-i mezbûr kırk beş bin akçeyi ve bedel-i tefvîz olan beş bin akçe ki cem‘an elli bin Akçeyi bi tamâmihî mezbûr Aleksi yedinden alıp kabz eyledim ba‘de’l-yevm menzil-i mezbûr merkūm Aleksi’nin mülk-i müşterâsı ve sâlifü’z-zikr çayır dâhil-i taht-ı tasarrufu olmuşdur dedikde gıbbe’t-tasdîki’ş-şer‘î mâ vaka‘a ketb olundu. Târihuhü’l-mezbûr. Şuhûdü’l-hâl: Mustafa b. İsa er-Râcil, Yusuf Çelebi b. Mustafa, Hasan Beşe b. Abdullah, İbrahim b. Mustafa, Ali Çelebi b. Mehmed, Mehmed Beşe b. Abdullah, Hırsafo v. Yani, Yorgi v. Apostol, Rali v. Yani, Rizo v. Franko, Yani v. Yorgi, Teriye v. ( ), Simo v. Mihal, Yorgi v. Nikola, Dimitri v. ( ).