Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 290 Hüküm no: 358 Orijinal metin no: [57b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Nazenin bt. Abdullah’ın bir miktar ev eşyasını Mustafa b. Ebülleys’e hibe ettiği Medîne-i Hazret-i Ebî Eyyûb el-Ensârî mahallâtından Nişancı mahallesinde sâkine Nâzenin bt. Abdullah nâm hâtun mahfil-i kazâda râfi‘ü’l-kitâb Mustafa b. Ebülleys nâm kimesne muvâcehesinde bi tav‘ihâ ikrâr ve i‘tirâf edip silk-i mülk-i sahîhimde münselik eşyâmdan dört aded yemeni yorgan ve iki aded beledî döşek ve dört aded dokuma yasdık ve dört aded sahan ve iki aded bakır tepsi ve iki aded güğüm ve iki aded tencere ve bir tava ve bir sini ve iki aded kefçe ve bir tas ve bir keçe ve bir kaliçe ve iki minder ve bir maşraba ve bir sepet sandığı ve bir ayaklı sandığı mezbûr Mustafa’ya ba‘de’l-ikrâr hibe-i sahîha-i şer‘iyye ile hibe ve teslîm edip ol dahi meclis-i hibede eşyâ-i mezbûreyi ittihâb ve kabz ve tesellüm etmeğin ba‘de’l-yevm eşyâ-i merkūme mezbûr Mustafa’nın mülk-i mevhûbu olmuşdur. Ba‘de’l-yevm keyfe mâ yeşâ’ ve yahtâr mutasarrıf olsun dedikde mukırra-i mezbûre Nâzenin Hâtun’un vech-i meşrûh üzre cârî ve sâdır olan ikrârını el-mukarru lehü’l-merkūm Mustafa vicâhen tasdîk ve eşyâ-i merkūmeyi mülk-i mevhûbu olmak üzre kabz eylediğini şifâhen tahkīk edicek mâ hüve’l-vâki‘ ketb olundu. Fi’l-yevmi’s-sâlis aşer min Şevvâli’l-mükerrem li sene seb‘a ve erba‘în ve elf. Şuhûdü’l-hâl: Abdurrahman Efendi b. eş-Şeyh Musa, Ramazan Halîfe b. Hüseyin, Abdi b. Sefer, Hüseyin b. Abdullah, Mustafa Dede b. Ahmed b. Cafer, İbrahim b. Abdi, Mehmed b. Abdi.