Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 290 Hüküm no: 359 Orijinal metin no: [57b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İlya v. Simon’un Osman Bey b. Abdullah’a bazı eşya bedelinden dolayı borcu olduğu Mahmiye-i İstanbul’da Hocapaşa mahallesinde vâki‘ Alaman oğlu menzili kurbunda sâkin Yahud tâifesinden Sinyora cemâ‘atinden İpekçi v. Salamon nâm Yahudi mahfil-i kazâda işbu bâ‘isü’l-kitâb Osman Bey b. Abdullah nâm cündî muvâcehesinde bi’t-tav‘i’s-sâf ikrâr ve i‘tirâf edip mezbûr Osman Bey’e levni ve cinsi ve kadri beynimizde ilm-i şer‘î ile ma‘lûm olup müşterâ ve makbûzum olan çuka bahâsından târih-i kitâbdan üç yüz altmış gün tamâmına değin müeccel olmak üzre zimmetimde lâzımü’l-edâ ve vâcibü’l-kazâ on bir bin beş yüz nakd-i râyic fi’l-vakt fıddî akçe deynim vardır dedikde mukırr-ı merkūm İlya’nın vech-i meşrûh üzre cârî ve sâdır olan ikrâr ve i‘tirâfını el-mukarru lehü’l-merkūm Osman Bey vicâhen tasdîk ve meblağ-ı merkūm on bir bin beş yüz akçeyi minvâl-i muharrer üzre te’cîl eylediğini şifâhen tahkīk ettikden sonra merkūm İlya’nın vâlidesi işbu hâzıratü bi’l-meclis Efdebola bt. İlya nâm Yahudiye meblağ-ı merkūme emr ve kabûlü hâviye kefâlet ile kefîl olmağın mâ hüve’l-vâki‘ gıbbe’t-taleb ketb olundu. Fi’l-yevmi’l-âşir min Şevvâli’l-mükerrem li sene seb‘a ve erba‘în ve elf. Şuhûdü’l-hâl: Receb Efendi b. Abdi, Mahmud Çelebi b. Ahmed, Mustafa b. Ahmed, Mehmed Çelebi b. Veli, Mustafa b. Veli, Ali b. Ramazan, Ali b. Abdullah, Mustafa b. Ahmed, Abdülkādir b. ( ) el-Muhzır ve gayruhüm.