Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 291 Hüküm no: 361 Orijinal metin no: [58a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Salamon v. İlya’nın varislerinin birbirlerinin zimmetini ibra ettikleri Havâss-ı Refî‘a kazâsı müzâfâtından Hasköy demekle ma‘rûfe karye mahallâtından Yahud mahallesinde sâkin iken bundan akdem hâlik olan Salamon v. İlya nâm Yahudi’nin verâseti zevce-i metrûkesi ve vârisesi Firostine bt. Yahuda Tezbin ile sulbî kebîr oğulları Yasefera ve İlyafera nâm Yahudiler ile sulbiye-i kebîre kızı Panorya’ya münhasıra olup kable’l-kısme mezbûr İlyafera dahi hâlik olup kezâlik verâseti sulbî kebîr oğlu Salamon ile vâlidesi merkūme Firostine’ye münhasıra olduğu şer‘an müte‘ayyin oldukdan sonra mezbûrân Yasef ve Salamon asâleten ve merkūme Panorya tarafından dahi husûs-ı âti’z-zikri ikrâra vekîl olup hasm-ı câhid mahzarında İlkano v. Yahuda ve İlya v. Paroh nâm Yahudiler şehâdetleri ile şer‘an vekâleti sâbite olan zevci Yahuda v. Viko nâm Yahudi vekâleten mahfil-i kazâda bâ‘isetü’l-kitâb merkūme Firostine muvâcehesinde her biri ikrâr-ı tâm ve takrîr-i kelâm edip mûrisimiz hâlik-i merkūm Salamon târih-i kitâbdan otuz sene mukaddem hâl-i hayâtında mahalle-i merkūmede vâki‘ bir tarafı Racil nâm Yahudi mülkü ve bir tarafı İlya v. Oz nâm Yahudi mülkü ve bir tarafı tarîk-i hâs ve bir tarafı tarîk-i âm ile mahdûd olup altı bâb fevkānî odaları ve bir bâb tahtânî odayı ve iki bâb tahtânî fırını ve bir bâb fevkānî matbahı ve fırını ve fevkānî bir kenîfi ve tahtânî bir matbah ve iki fırını ve bir tahtânî kenîfi ve bi’r-i mâ ve muhavvatayı ve bir dut ağacını müştemil olan mülk menzilinin mezbûr Racil tarafından vâki‘ dört bâb odayı ve fevkānî bir kenîfi ve bir bâb fevkānî matbahı ve fırını ve bir tahtânî mahzeni ve bir bâb tahtânî odayı ve tahtânî kenîfi ve tahtânî bir matbah ve iki fırını müştemil olan nısf-ı şâyi‘ini, merkūme Firostine’ye tarafeynden îcâb ve kabûlü hâvî bey‘-i bâtt-ı sahîh-i şer‘î ile yirmi bin nakd-i râyic fi’l-vakt fıddî akçeye bey‘ ve teslîm edip ol dahi vech-i muharrer üzre iştirâ ve tesellüm eyledikden sonra semeni olan meblağ-ı mezbûr yirmi bin akçeyi yedinden bi’t-tamâm ve’l-kemâl ahz ve kabz eylemişidi ve tarîk-i hâs cânibinde vâki‘ iki bâb fevkānî odayı ve bir tahtânî mahzeni [ve] bi’r-i mâyı ve muhavvatayı ve dut ağacını müştemil olan nısf-ı şâyi‘ini dahi yine mezbûr Salamon hâl-i hayâtında ma‘kūdun-aleyh olup zimmetinde mütekarrir olan merkūme Firostine’nin yüz yirmi bin akçe mehrinden altı bin akçesi mukābelesinde kendiye def‘ ve teslîm eyleyip ol dahi kabz ve tesellüm eylemişidi menzil-i mezbûrun nısfı merkūme Firostine’nin vech-i meşrûh üzre şirâ tarîki ile mülkü ve nısf-ı âharı dahi altı bin akçe mehri mukābelesinde mülkü olup ile’l-ân taht-ı yedinde ve tasarrufundadır. Menzil-i mezbûrda vechen mine’l-vücûh bizim alâka ve medhalimiz yokdur dediklerinde mukırrûn-ı mezbûrûn Salamon ve Yasefera ve İlyafera asâleten ve vekâleten minvâl-i meşrûh üzre cârî ve sâdır olan ikrâr [ve] takrîrlerin merkūme Firostine vicâhen tasdîk ve şifâhen tahkīk edicek mâ hüve’l-vâki‘ gıbbe’t-taleb ketb olundu. Tahrîren fi’l-yevmi’l-hâdî min şevvâli’l-mükerrem li sene seb‘a ve erba‘în ve elf. Mine’l-hicreti men lehü’l-izzü ve’ş-şeref. Şuhûdü’l-hâl: Receb Efendi b. Abdi, Mahmud Bey b. Mehmed, Durak Bey b. Kurd el-Bezzâz, Mehmed Bey b. Mahmud el-Bezzâz, Mustafa b. Mahmud, Ali b. Abdullah, kâtibü’l-hurûf Abdülkādir, İlya v. Paroh ve gayruhüm.