Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 293 Hüküm no: 362 Orijinal metin no: [58a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Salamon v. İlya’nın varislerinin birbirlerinin zimmetini ibra ettikleri Havâss-ı Refî‘a kazâsı müzâfâtından Hasköy demekle ma‘rûfe karye mahallâtından Yahud mahallesinde sâkin bundan akdem hâlik olan Salamon v. İlya nâm Yahudi’nin verâseti zevce-i metrûkesi ve vârisesi Firostine bt. Yahuda Tezbin ile sulbî kebîr oğulları Yasef ve İlyafera nâm Yahudilere ve sulbiye-i kebîre kızı Panorya’ya münhasıra olup kable’l-kısme mezbûr İlyafera dahi hâlik olup, kezâlik verâseti sulbî kebîr oğlu Salamon ile vâlidesi merkūme Firostine’ye münhasıra olduğu şer‘an müte‘ayyin oldukdan sonra mezbûre Firostine mahfil-i kazâda merkūm Salamon ve Yasef ve Panorya mahzarlarında ikrâr ve i‘tirâf edip mûrisimiz hâlik-i merkūmun muhallefâtından bana isâbet eden sümün hisse-i şer‘iyyem ile ma‘kūdun-aleyh olup zevcim hâlik-i merkūm Salamon’un zimmetinde mütekarrir olan yüz yirmi bin akçe mehrimden bâkī kalan yetmiş bin akçe bâkī mehrim mukābelesinde mezbûr Salamon’un hîn-i helâkinde beynimizde cinsi ve nev‘i ve adedi ma‘lûm esâs-ı beyt ve evânî-i nühâs ile Rûsiyyetü’l-asl Kali nâm memlûke câriye ahz ve kabz edip mâ‘adâdan verese-i mezbûrenin zimmetlerin ibrâ-i âmm-ı kātı‘ü’n-nizâ‘la bi’l-külliye ibrâ ve iskāt eylemiş idim hâlik-i mezbûrun metrûkâtına müte‘allik mezbûrûn Salamon ve Yasef ve Panorya ile hâlâ dahi vechen mine’l-vücûh da‘vâ ve nizâ‘ım yokdur dedikde mukırra-i mezbûre Firostine’nin minvâl-i muharrer üzre cârî ve sâdır olan ikrâr ve i‘tirâfı mezbûrûn Salamon ve Yasef ve Panorya her birini vechen tasdîk ve şifâhen tahkīk etmeğin mâ hüve’l-vâki‘ gıbbe’t-taleb ketb olundu. Târihuhü’l-mezbûr. Şuhûdü’l-hâl: Es-Sâbikūn.