Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 293 Hüküm no: 363 Orijinal metin no: [58a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Veli b. Bâli’nin alacaklı olduğu Nikola v. Panayot ile sulh olduğu Mahmiye-i Kostantıniyye ebvâbından Balatkapısı dâhilinde sâkin ağdacı tâifesinden Veli b. Bâli nâm kimesne mahfil-i kazâda işbu bâ‘isü’l-kitâb Nikola v. Panayot nâm zimmî muvâcehesinde ikrâr ve takrîr-i kelâm edip işbu hâzır bi’l-meclis Yusuf b. Abdullah nâm abd-i memlûkümü târih-i kitâbdan bir ay mukaddem Havâss-ı Refî‘a kazâsı müzâfâtından Hasköy demekle ma‘rûf karyede Ağda satmak için dört güğüm ağda ile irsâl eylediğimde mezbûr Nikola mestâne olduğu hâlde gelip mezbûr Yusuf’un elinden zikr olunan dört güğüm ağdayı fuzûlen alıp döküp helâk etmekle mezbûr Nikola[’yı] da‘vâ etmek üzre idim el-hâletü hâzihî beynimizde muslihûn tavassut edip husûs-ı mezbûrdan beni altı yüz nakd-i râyic fi’l-vakt fıddî akçe üzerine inşâ-i akd-i sulh eylediklerinde ben dahi sulh-i mezbûru kabûl ve bedel-i sulh olan meblağ-ı merkūm altı yüz akçeyi yedinden bi’t-tamâm ahz ve kabz edip husûs-ı mezbûra müte‘allik da‘vâdan merkūm Nikola’nın zimmetini ibrâ-i âmm-ı kātı‘ü’n-nizâ‘la ibrâ ve iskāt eyledim min ba‘d da‘vâ ve nizâ‘ım kalmadı dedikde gıbbe’t-tasdîk mâ vaka‘a ketb olundu. Târihuhü’l-mezbûr. Şuhûdü’l-hâl: Mustafa b. Ahmed, Mahmud b. Ahmed, Ali b. Mustafa, Ali b. Abdullah, Cafer b. Abdullah.