Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 294 Hüküm no: 364 Orijinal metin no: [58b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hasan Beşe b. Mehmed’in miras menzil ve tarlalarının Hasan b. Hüseyin’e satılması Vilâyet-i Rumeli’nde İskarapar kazâsına tâbi‘ Fakrak nâm karyede sâkin iken bundan akdem müteveffâ olan Hasan Beşe b. Mehmed’in sulbî sagīr oğlu Yusuf’un tesviye-i umûruna kıbel-i şer‘den mansûb vasîsi olan Hüseyin b. Kasım nâm kimesne mahfil-i kazâda işbu hâmilü’l-kitâb Hasan b. Hüseyin nâm kimesne mahzarında bi’l-vesâye ikrâr-ı tâm ve takrîr-i kelâm edip sagīr-i mezbûra babası müteveffâ-yı mezbûrdan irs-i şer‘î ile intikāl eden karye-i mezbûrede vâki‘ bir tarafdan Hüseyin Bey mülkü ve bir tarafdan Hasan ve bir tarafdan ba‘zan Mehmed Şah tasarrufunda olan tarla ve ba‘zan Hüseyin tasarrufunda olan tarla ile mahdûd iki bâb tahtânî beyti ve dört dip zeytin ve on beş dip incir ve on beş dip asma ve beş dip ceviz ve altı dip enar ve beş dip bâdem eşcârı müştemil menzilden gayrı akār ve menkūl kısmından terekesi olmayıp sagīr-i mezbûrun zarûret-i nafakasiyçün menzil-i mezbûr bey‘ olunmak lâzım gelmeğin sûk-ı sultânîde kirâren ve mirâren nidâ ve müzâyede olunup rağabât-ı nâs bi’l-külliye münkatı‘ olup mezbûr Hasan üzerinde fıddî nakd-i râyic fi’l-vakt üç bin akçede karâr edip ziyâde ile tâlib-i âharı olmamağla, vesâyet-i mahkiyem hasebiyle üç bin akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile zarûret-i nafaka için bey‘ edip ol dahi vech-i meşrûh üzre iştirâ ve kabûl eyledikden sonra yine hudûd-ı mezbûre dâhilinde sagīr-i mezbûr Yusuf’a babası müteveffâ-yı mezbûr Hüseyin Beşe’den intikāl-i âdî ile intikāl edip üç keyl tohum istî‘âb eder bir kıt‘a tarlanın ve karye-i mezbûre hudûdu dâhilinde mevâzi‘-i adîdede vâki‘ lede’l-ahâlî ve’l-cîrân ma‘lûmü’l-hudûd altı kıt‘a tarlamın ve Uyanık nâm yaylakda vâki‘ lede’l-ahâlî ma‘lûmü’l-hudûd hissesinin dahi hakk-ı tasarruflarını, sâhib-i arz ma‘rifetiyle zarûret-i nafaka için mezbûr Hasan’a üç bin mezbûrü’n-na‘t akçe mukābelesinde tefvîz edip ol dahi minvâl-i meşrûh üzre tefevvuz ve kabûl eyledikden sonra semen-i mezbûr üç bin akçe ile bedel-i tefvîz olan üç bin akçe ki cem‘an altı bin akçeyi bi’t-tamâm ve’l-kemâl mezbûr Hasan yedinden ahz ve kabz edip mebî‘-i mezbûru mahallinde ahz ve kabza ve tarlaları zabt ve tasarrufa mezbûr Hasan’ı taslît eyledim dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Tahrîren fi’l-yevmi’r-râbi‘ aşer min Şevvâli’l-mükerrem li sene seb‘a ve erba‘în ve elf. Şuhûdü’l-hâl: Mehmed Bey b. Sinan, Süleyman b. Timur, Kasım b. Mehmed, Sinan b. Hasan, Hasan b. Sinan, Mehmed b. Hüseyin, Oruc b. Ömer.