Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 295 Hüküm no: 365 Orijinal metin no: [58b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hasan Beşe b. Abdullah’ın menzil, bağ ve tarlalarını Kosta v. Lazari’ye sattığı Havâss-ı Aliyye kazâsı müzâfâtından Büyükçekmece nâhiyesine tâbi‘ Dimo Kranya nâm karye sâkinlerinden Hasan Beşe b. Abdullah nâm râcil mahfil-i kazâda işbu hâmilü’s-sifr Kosta v. Lazari nâm zimmî muvâcehesinde bi’t-tav‘i’s-sâf ikrâr ve i‘tirâf edip karye-i mezbûrede vâki‘ bir tarafdan mezbûr Kosta mülkü ve bir tarafdan Hırsafi nâm zimmî mülkü ve bir tarafdan Avyaro nâm zimmî mülkü ve bir tarafdan tarîk-i âm ile mahdûd bir bâb fevkānî ve bir bâb tahtânî iki beyti ve muhavvatayı müştemil mülk menzilimi cümle tevâbi‘ ve levâhıkı ile yine karye-i mezbûre sınırında vâki‘ bir tarafdan mezbûr Hırsafi bağı ve bir tarafdan mezbûr Kosta bağı ve bir tarafdan Avyaro nâm zimmî bağı ve bir tarafdan diğer Avyaro tarlası ile mahdûd bir kıt‘a mülk bağımı mezbûr Hristo’ya [Kosta’ya] fıddî nakd-i râyic fi’l-vakt altı bin akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm edip ol dahi vech-i meşrûh üzre iştirâ ve tesellüm eyledikden sonra yine karye-i mezbûre hudûdu dâhilinde mevâzi‘-i adîdede vâki‘ lede’l-ahâlî ve’l-cîrân ma‘lûmü’l-hudûd on yedi keyl tohum istî‘âb eder dört kıt‘a tarlalarımın dahi hakk-ı tasarruflarını, sâhib-i arz ma‘rifetiyle mezbûr Kosta’ya bin yedi yüz mezbûrü’n-na‘t akçe mukābelesinde tefvîz edip ol dahi minvâl-i meşrûh üzre tefevvuz ve kabûl eyledikden sonra semen-i mezbûr altı bin akçe ile bedel-i tefvîz olan bin yedi yüz akçe ki cem‘an yedi bin yedi yüz akçeyi bi’t-tamâm ve’l-kemâl mezbûr Kosta yedinden alıp kabz eyledim ba‘de’l-yevm sâlifü’z-zikr menzil ve bağ mezbûr Kosta’nın mülk-i müşterâsı ve tarlalar dâhil-i taht-ı tasarrufu olmuşdur dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Târihuhü’l-mezbûr. Şuhûdü’l-hâl: Murad b. Mehmed, Musli Beşe b. Murad, Halil b. Abdullah, Mustafa, Receb Efendi b. Abdi, Mahmud b. Ahmed, Ali b. Mustafa, Ali b. Abdullah ve gayruhüm.