Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 295 Hüküm no: 366 Orijinal metin no: [58b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Firostine Yahuda Tezbin’in menzilini İlyafera’nın oğlu Salamon’a sattığı Havâss-ı Refî‘a kazâsı müzâfâtından Hasköy demekle ma‘rûfe karye mahallâtından Yahud mahallesinde sâkine Firostine Yahuda Tezbin nâm yahudiyye mahfil-i kazâda sadrî kebîr oğlu İlyafera nâm hâlikin sulbî kebîr oğlu işbu râfi‘ü’l-kitâb Salamon nâm Yahudi mahzarında bi’t-tav‘i’s-sâf ikrâr ve i‘tirâf edip mahalle-i merkūmede vâki‘ bir tarafı Rafael nâm yahudi mülkü ve bir tarafı İlya v. Oz nâm yahudi mülkü ve bir tarafı tarîk-i hâs ve bir tarafı tarîk-i âm ile mahdûd olup altı bâb fevkānî odaları ve bir bâb tahtânî odayı ve iki bâb tahtânî mahzeni ve bir bâb fevkānî matbah ve fırını ve fevkānî bir kenîfi ve tahtânî bir matbahı ve iki fırını [59a] ve bir tahtânî kenîfi ve bi’r-i mâ ve muhavvatayı ve bir dut ağacını müştemil olan mülk menzilimi, cümle tevâbi‘ ve levâhıkı ile mezbûr Salamon’a tarafeynden îcâb ve kabûlü hâvî bey‘-i bâtt-ı sahîh-i şer‘î ile altı yüz kıt‘a tâmmü’l-vezn ve sahîhü’l-ayâr riyâlî kebîr guruşa bey‘ ve teslîm edip ol dahi vech-i muharrer üzre iştirâ ve tesellüm eyledikden sonra semeni olan mezbûrü’n-na‘t altı yüz kıt‘a guruşu yedinden bi’t-tamâm ve’l-kemâl ahz ve kabz eyledim ba‘de’l-yevm menzil-i merkūm mezbûr Salamon’un mülk-i müşterâsıdır. Keyfe mâ yeşâ’ ve yahtâr mutasarrıf olsun dedikde gıbbe’t-tasdîki’ş-şer‘î mezbûr Firostine’nin âhar oğlu işbu hâzır bi’l-meclis Yasef nâm Yahudi menzil-i mezbûrun derkine emr ve kabûlü hâviye kefâlet ile kefîl olmağın mâ hüve’l-vâki‘ gıbbe’t-taleb ketb olundu. Fi’l-yevmi’l-hâmis aşer min Şevvâli’l-mükerrem sene seb‘a ve erba‘în ve elf. Şuhûdü’l-hâl: Receb Efendi b. Abdi, Mehmed Bey b. Abdi, Durak Bey b. Kurd, Mustafa b. Mehmed, Ali b. Abdullah, Ali b. Mustafa, Abdülkādir el-Eyyûbî, İlya v. Paroh, İlkano v. Yahuda.