Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 296 Hüküm no: 367 Orijinal metin no: [59a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kiko v. Niko’nun bağını Hilo v. Kiti’ye sattığı Vilâyet-i Rumeli’nde Ergirikasrı kazâsına tâbi‘ Dukatlı nâm karye sâkinlerinden Kiko v. Niko nâm zimmî meclis-i şer‘-i hatîr-i lâzımü’t-tevkīrde işbu hâmilü’s-sifr Hilo v. Kiti nâm zimmî muvâcehesinde bi’t-tav‘i’s-sâf ikrâr ve i‘tirâf edip karye-i mezbûre sınırında vâki‘ bir tarafdan Kiro v. Dido bağı ve bir tarafdan Marko v. Minho bağı ve bir tarafdan Kiro [v.] Çuta nâm zimmî bağı ve bir tarafdan kilise vakfı olan arz-ı hâliye ile mahdûd zeytin ve dut eşcârını müştemil bir kıt‘a mülk bağımı mezbûr Hilo’ya fıddî nakd-i râyic fi’l-vakt bin yedi yüz elli akçeye tarafeynden îcâb ve kabûlü hâviye bey‘-i bâtt-ı sahîh-i şer‘î ile bey‘ edip ol dahi vech-i meşrûh üzre iştirâ ve kabûl eyledikden sonra semen-i mezbûr bin yedi yüz elli akçeyi bi’t-tamâm ve’l-kemâl mezbûr Hilo yedinden ahz ve kabz edip mebî‘-i mezbûru mahallinde zabt ve tasarrufa mezbûr Hilo’yu taslît eyledim ba‘de’l-yevm zikr olunan bağ-ı mezbûr Hilo’nun mülk-i müşterâsı olmuşdur dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Tahrîren fi’l-yevmi’r-râbi‘ aşer min Şevvâli’l-mükerrem li sene seb‘a ve erba‘în ve elf. Şuhûdü’l-hâl: Mahmud b. Ahmed, Mustafa b. Veli, Ali b. Mustafa, Kiro [v.] Kola, Dimo [v.] Kiti, Kika [v.] Tanaşi, Dido [v.] Kato, Dimo [v.] Duka, Tanaş [v.] Dido, Diro [v.] Kiti, Diro [v.] Nika, Tanaş [v.] Niko, Hilo, Dimo [v.] Kiro, Kiti [v.] Kiro.