Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 305 Hüküm no: 378 Orijinal metin no: [61a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ali b. İshak’ın menzilini Havva bt. Abdullah’a sattığı Havâss-ı Aliyye kazâsı müzâfâtından Hasköy’de el-Hâc Şaban mahallesinde sâkin Ali b. İshak nâm kimesne meclis-i şer‘-i hatîr-i lâzımü’t-tevkīrde işbu hâmiletü’l-kitâb Havva bt. Abdullah nâm hâtun tarafından husûs-ı âti’z-zikri tasdîka vekîl olup vekâlet-i mezbûre Havva’yı ma‘rifet-i şer‘iyye ile ârifeyn olan Ahmed Çelebi b. Abdullah el-İmâm Ali b. Hüseyin şehâdetleri ile şer‘an vekâleti sâbite olan Mehmed b. Turgud mahzarında bi’t-tav‘i’s-sâf ikrâr ve i‘tirâf edip mahalle-i mezbûrede vâki‘ bir tarafdan Bekir b. Ömer mülkü ve bir tarafdan Mehmed b. Mehmed mülkü ve bir tarafdan ba‘zan Mehmed b. Mustafa mülkü ve ba‘zan Mehmed b. Abdülcebbâr mülkü ve ba‘zan Zâhide Hâtun mülkü ve bir tarafdan ba‘zan Mehmed b. Abdullah mülkü ve ba‘zan yine benim mülküm ile mahdûd iki bâb fevkānî beyti ve bir bâb tahtânî beyti ve ahırı ve bi’r-i mâyı ve kenîfi ve muhavvatayı müştemil mülk menzilimi sokak kapısı benim ile müşterek olmak üzre cümle tevâbi‘ ve levâhık ile mezbûre Havva’ya fıddî nakd-i râyic fi’l-vakt on üç bin akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm edip ol dahi vech-i meşrûh üzre iştirâ ve kabûl ve tesellüm eyledikden sonra semen-i mezbûr on üç bin akçeyi bi’t-tamâm ve’l-kemâl mezbûre Havva yedinden ahz ve kabz eyledim ba‘de’l-yevm zikr olunan menzil-i mezbûre Havva’nın mülk-i müşterâsı olmuşdur. Keyfe mâ teşâ’ ve tahtâr mutasarrıfe olsun dedikde mukırr-ı mezbûr Ali’yi minvâl-i meşrûh üzre cârî olan ikrârında vekîl-i merkūm Mehmed vicâhen tasdîk ve şifâhen tahkīk edicek mâ vaka‘a gıbbe’t-taleb ketb olundu. Tahrîren fi’l-yevmi’s-sâdis aşer min Şevvâli’l-mükerrem li sene seb‘a ve erba‘în ve elf. Şuhûdü’l-hâl: Ali b. Mehmed, Bekir b. Ömer, Mehmed b. Abdülcebbâr, Mustafa b. Mehmed, Himmet b. Abdülcebbâr, Ali b. Hasan, Hasan b. Uğurlu, Ahmed b. İlyas Ali b. Abdullah, Ali b. Mustafa.