Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 305 Hüküm no: 379 Orijinal metin no: [61b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İnayet Hatun bt. Abdullah’ın menzilini Mehmed b. Hasan’a sattığı Medîne-i Hazret-i Ebî Eyyûb el-Ensârî mahallâtından Otakçıbaşı mahallesi sâkinelerinden İnâyet Hâtun bt. Abdullah meclis-i şer‘-i hatîr-i lâzımü’t-tevkīrde işbu hâmilü’l-kitâb Mehmed b. Hasan mahzarında bi tav‘ihâ ikrâr ve i‘tirâf edip mahalle-i mezbûrede vâki‘ bir tarafdan Mustafa Bey b. ( ) el-Cündî mülkü ve bir tarafdan ba‘zan Sâliha Hâtun bt. Rıdvan mülkü ve ba‘zan Fâtıma Hâtun bt. Murad mülkü ve bir tarafdan ba‘zan Aydın Halîfe b. İbrahim el-İmâm mülkü ve ba‘zan mahalle-i mezbûre müezzinine vakıf olan menzil ve bir tarafdan tarîk-i hâs ile mahdûd iki bâb tahtânî beyti ve sundurmayı ve bi’r-i mâyı ve kenîfi ve muhavvatayı ve zât-ı eşcâr-ı müsmire ve gayr-ı müsmireli hadîkayı müştemil mülk menzilimi, cümle tevâbi‘ ve levâhıkı ile mezbûr Mehmed’e fıddî nakd-i râyic fi’l-vakt on bin akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm edip ol dahi vech-i meşrûh üzre iştirâ ve kabûl ve tesellüm eyledikden sonra semen-i mezbûr on bin akçeyi bi’t-tamâm ve’l-kemâl mezbûr Mehmed yedinden ahz ve kabz eyledim ba‘de’l-yevm zikr olunan menzil mezbûr Mehmed’in mülk-i müşterâsı olmuşdur. Keyfe mâ yeşâ’ ve yahtâr mutasarrıf olsun dedikde mukırra-i mezbûre İnâyet Hâtun’u minvâl-i muharrer üzre cârî olan ikrârının el-mukarru lehü’l-merkûn Mehmed vicâhen tasdîk ve şifâhen tahkīk etmeğin mâ vaka‘a el-vâki‘ bi’t-taleb ketb olundu. Tahrîren fi’l-yevmi’l-hâmis min Şevvâli’l-mükerrem sene seb‘a ve erba‘în ve elf. Şuhûdü’l-hâl: Aydın Halîfe b. İbrahim el-İmâm, Hasan Halîfe b. ( ) el-Müezzin, Ali b. İlyas, Hasan b. Ali, Kurt b. Ali, Piyâle Beşe b. Abdullah, Receb b. Sefer, Receb b. Mustafa, Mustafa Çelebi b. Hasan el-Cündî, Murad Beşe b. Mehmed er-Râcil.