Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 306 Hüküm no: 380 Orijinal metin no: [61b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İsmihan bt. Pervane’nin köle Siyavuş b. Abdullah üzerindeki hissesini serbest bırakması Havâss-ı Refî‘a kazâsı müzâfâtından Terkos nâhiyesine tâbi‘ Baklalı nâm karyede sâkin iken bundan akdem müteveffâ olan Sâdık Ağa nâm kimesnenin verâseti zevce-i metrûkesi İsmihan bt. Pervâne nâm hâtun ve sulbî kebîr oğlu Mehmed ve sulbiye kebîre kızı Âişe’ye münhasıra olup, muhallefâtının sekiz sehimden bir sehmi mezbûre İsmihan’a ve yedi sehmi li’z-zekeri mislü hazzi’l-ünseyeyn mezbûrân Mehmed ve Âişe’ye isâbet eylediği şer‘an mütebeyyin oldukdan sonra mezbûre İsmihan mahfil-i kazâda müteveffâ-yı mezbûrun metrûkâtından işbu orta boylu, sarışın ve sarı sakallı, elâ gözlü, açık kaşlı Rûsiyyü’l-asl müslimiyyü’l-mille başının sağ tarafında alâmet-i cerh olan işbu hâmilü’l-kitâb Siyavuş b. Abdullah nâm memlûk gulâm mahzarında bi tav‘ihâ ikrâr-ı tâm ve takrîr-i kelâm edip mezbûr Siyavuş’un rakabesinde olan sümün hisse-i şer‘iyyemi, hasbeten lillâhi te‘âlâ ve hereben min azâbihi’l-elîm, "yevme lâ yenfa‘u mâlün velâ benûn illâ men etallâhe bi kalbin selîm" i‘tâk ve tahrîr eyledim dedikde mukırra-i mezbûre İsmihan’ın ikrâr-ı meşrûhunu el-mukarru lehü’l-merkūm Siyavuş vicâhen tasdîk ve şifâhen tahkīk etmeğin mâ hüve’l-vâki‘ bi’t-taleb ketb olundu. Tahrîren fi’l-yevmi’s-sâdis min Şevvâli’l-mükerrem li sene seb‘a ve erba‘în ve elf. Şuhûdü’l-hâl: Müstedâm b. Resûl el-Müezzin, Mehmed b. Safer, Hasan Çelebi b. ( ), Abdurrahman b. ( ), İbrahim Ağa b. Abdi, Nasuh b. Mehmed, Bekir Hoca el-Müezzin, nalband Hüseyin, Mehmed b. İbrahim, Keyvan b. Abdullah.