Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 307 Hüküm no: 382 Orijinal metin no: [61b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Fâtıma bt. Hüseyin ile annesinin alacak iddia ettikleri Receb b. Hasan’ın zimmetini ibra etmeleri Mahmiye-i Kostantıniyye hısnı ebvâbından Ebî Eyyûb el-Ensârî kapısı dâhilinde Mustafa Paşa-yı Atîk mahallesinde sâkine Fâtıma bt. Hüseyin nâm hâtun mahfil-i kazâda zevc-i mutallıkı işbu râfi‘ü’l-kitâb Receb b. Hasan mahzarında bi tav‘ihâ ikrâr ve takrîr-i kelâm edip mezbûr Receb zimmetinde mütekarrir üç bin beş yüz akçe mehr-i müeccelimi ve farz olunmuş nafaka-i iddetimi ve mezbûr Receb’den mütevellid olup bundan akdem müteveffâ olan sadr[î] oğlum Hüseyin nâm sagīrin nafaka-i mefrûzasını mezbûr Receb’den taleb [ve] da‘vâ eylediğimde beynimizde münâza‘ât-ı kesîre ve muhâsamât-ı adîde vâkı‘a olmuşidi el-hâletü es-sulhu seyyidü’l-ahkâm muktezâsınca mâbeynimize muslihûn tavassut edip husûs-ı mezbûrdan beni bin üç yüz [akçe] üzerine sulh eylediklerinde ben dahi sulh-i mezbûru kabûl ve bedel-i sulh olan meblağ-ı mezbûr bin üç yüz akçeyi bi’t-tamâm ve’l-kemâl mezbûr Receb [62a] yedinden ahz ve kabz edip zikr olunan husû[s]lara müte‘allik da‘vâ ve talebden mezbûr Receb’in zimmetini ibrâ-i âmm-ı kātı‘ü’n-nizâ‘la bi’l-külliye ibrâ ve iskāt eyledim min ba‘d husûs-ı mezbûra müte‘allik benden bi’z-zât ve bi’l-vâsıta da‘vâ ve nizâ‘ sudûr ve zuhûr ederse lede’l-hükkâmi’l-kirâm mesmû‘a ve makbûle olmaya dedikde mezbûr Fâtıma’nın minvâl-i meşrûh üzre cârî olan ikrârını mezbûr Receb bi’l-muvâcehe tasdîk ettikden sonra mezbûre Fâtıma’nın vâlidesi Eşme bt. Abdullah nâm hâtun dahi mezbûr Receb muvâcehesinde bi’t-tav‘ ikrâr ve i‘tirâf edip mezbûr Receb zimmetinde benim dahi yedi yüz akçe hakkım olup da‘vâ ve taleb sudûrunda idim hâlâ ben dahi terk-i da‘vâ edip zikr olunan yedi yüz akçe da‘vâsından mezbûr Receb’in zimmetini bi’l-külliye ibrâ ve iskāt eyledim ba‘de’l-yevm eğer benden meblağ-ı mezbûr yedi yüz akçeye müte‘allik ve sâir husûsa müte‘allik da‘vâ sudûr eder[se] lede’l-hükkâm mesmû‘a olmasın dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Tahrîren fi’l-yevmi’s-sâdis aşer min Şevvâli’l-mükerrem li sene seb‘a ve erba‘în ve elf. Şuhûdü’l-hâl: Mustafa b. Sefer, Hasan b. Mustafa, Ali b. Derviş, Hasan b. Behram, Hasan Çelebi, Mehmed b. Ahmed, Mustafa b. Veli.