Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 308 Hüküm no: 383 Orijinal metin no: [62a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hacı Hüseyin b. Ali’nin dâmâdı Eyüp b. Hüseyin aleyhindeki hırsızlık davasında sulh olunduğu Medîne-i Hazret-i Ebî Eyyûb el-Ensârî mahallâtından Zeyneb Hâtun mahallesinde sâkin el-Hâc Hüseyin b. Ali mahfil-i kazâda bâ‘is-i hâze’l-kitâb dâmâdı Eyüb b. Hüseyin mahzarında ikrâr ve i‘tirâf edip târih-i kitâbdan üç ay mukaddem mahalle-i merkūmede sâkin olduğum mülk menzilimden on beş bin nakd-i râyic fi’l-vakt fıddî akçem zâyi‘ olmağla dâmâdım merkūm Eyüb mazanna ittihâz edip meblağ-ı merkūmu da‘vâ ve taleb eylediğimde inkâr ile cevâb vermeğin beynimizde münâza‘ât-ı kesîre vâki‘ olmuşidi el-hâletü hâzihî mâbeynimize muslihûn tavassut edip husûs-ı mezbûrdan beni yedi bin nakd-i râyic fi’l-vakt fıddî akçe üzerine inşâ-i akd-i sulh eylediklerinde ben dahi sulh-i mezbûru kabûl ve bedel-i sulh olan meblağ-ı merkūm yedi bin akçeyi dâmâdım mezbûr Eyüb yedinden bi’t-tamâm ve’l-kemâl ahz ve kabz edip meblağ-ı merkūma müte‘allik da‘vâdan dâmâdım mezbûr Eyüb’ün zimmetini ibrâ-i âmm-ı kātı‘ü’n-nizâ‘ ile ibrâ ve iskāt eyledim min ba‘d da‘vâ ve nizâ‘ım kalmadı eğer bir tarîk ile husûs-ı mezbûra müte‘allik benden bi’z-zât ve bi’l-vâsıta da‘vâ sudûr ederse lede’l-hükkâmi’l-kirâm mesmû‘a ve makbûle olmaya dedikde mukırr-ı mezbûr el-Hâc Hüseyin’in vech-i meşrûh üzre cârî ve sâdır olan ikrâr ve i‘tirâfını el-mukarru lehü’l-merkūm Eyüb vicâhen tasdîk ve şifâhen tahkīk etmeğin mâ hüve’l-vâki‘ bi’t-taleb ketb olundu. Fi’l-yevmi’r-râbi‘ aşer min Şevvâli’l-mükerrem li sene seb‘a ve erba‘în ve elf. Şuhûdü’l-hâl: Mustafa Çavuş b. Halil, Ahmed Efendi b. ( ), Hüseyin Çelebi el-Câbî Mehmed Çelebi b. Mehmed, Receb Efendi, Abdülkādir Çelebi b. Mehmed, Mahmud b. Ahmed ve gayruhüm.