Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 309 Hüküm no: 384 Orijinal metin no: [62a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hasna bt. Abdullah’ın bazı ev eşyasını kölesi İbrahim b. Abdullah’a bağışladığı Medîne-i Hazret-i Ebî Eyyûb el-Ensârî mahallâtından Çavuş Kasım mahallesi sâkinelerinden Hasnâ bt. Abdullah nâm hâtun tarafından hibe-i âti’l-beyânı ikrâra vekîl olup vekâleti mezbûr Hasnâ’yı ma‘rifet-i şer‘iyye ile ârifeyn olan Mehmed b. Ahmed el-Müezzin ve diğer Mehmed b. Ali şehâdetleri ile şer‘an sâbite olan mezbûre Hasnâ’nın sadriye kızı Belkıs bt. Mahmud nâm hâtun meclis-i şer‘de ikrâr ve takrîr-i kelâm ve ta‘bîr ani’l-merâm edip vâlidem ve müvekkilem mezbûre Hasnâ silk-i mülk-i sahîhinde münselik olan emlâkinden bir alaca kilim ve bir bakraç ve bir bakır sini ve bir hamam leğeni ve bir köhne kaliçe ve iki köhne kebe ve dört yasdık kılıfı ve iki sepet sandığını işbu hâzır bi’l-meclis olan abd-i memlûkü İbrahim b. Abdullah nâm sagīre hibe-i sahîha-i şer‘iyye ile hibe ve temlîk edip meclis-i hibede yine vâlidem ve müvekkilem mezbûre Hasnâ velâyeten sagīr-i mezbûr İbrahim için ittihâb ve kabz ve tesellüm eyledi ba‘de’l-yevm sâlifü’z-zikr olan eşyâ sagīr-i mezbûr İbrahim’in mülk-i mevhûbu olmuşdur dedikde mâ vaka‘a zabten li’l-makāl ketb olundu. Tahrîren fi’l-yevmi’s-sâbi‘ aşer min Şevvâli’l-mükerrem li sene seb‘a ve erba‘în ve elf. Şuhûdü’l-hâl: Hüseyin Efendi b. Mehmed el-İmâm, Mehmed b. Ahmed el-Müezzin, Yusuf Çelebi b. ( ), Seydi Ali Çelebi b. Mehmed, Mustafa b. Bekir Dede, Yusuf b. Bâli, Hüseyin b. Hasan Beşe.