Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 310 Hüküm no: 386 Orijinal metin no: [62b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hatice bt. İnayetullah’ın miras menzilini kardeşi Abdülkâdir Efendi’ye sattığı Medîne-i Hazret-i Ebî Eyyûb el-Ensârî mahallâtından Aşçıbaşı mahallesi sâkinelerinden Hatice Hâtun bt. el-merhûm İnâyetullah Efendi meclis-i şer‘-i hatîr-i lâzımü’t-tevkīrde li ebeveyn karındaşı kıdvetü’l-erbâbi’t-tahrîr ve’l-kalem, umdetü ashâbü’t-tastîr ve’r-rakam Abdülkādir Efendi mahzarında bi tav‘ihâ ikrâr-ı tâm ve takrîr-i kelâm edip mahalle-i mezbûrede vâki‘ bir tarafdan merkūm Abdülkādir Efendi’ye babasından intikāl eden menzil ve bir tarafdan İshak Halîfe mülkü ve bir tarafdan Fâtıma Hâtun sâkine olduğu vakıf menzil ve bir tarafdan ba‘zan tarîk-i âm ve ba‘zan diğer Fâtıma Hâtun mülkü ile mahdûd olup iki bâb fevkānî beyti ve kenîfi ve zât eşcâr-ı müsmire ve gayr-ı müsmire bahçeyi ve mezbûr İshak Halîfe ile müşterek bi’r-i mâyı ve garb cânibine meftûh olup karındaşım mezbûr Abdülkādir Efendi ile müşterek sokak kapısını müştemil babam merhûm İnâyetullah Efendi’den irs-i şer‘î ile intikāl eden mülk menzilimi, cümle tevâbi‘ ve levâhıkı ve âmme-i menâfi‘ ve merâfıkı ile karındaşım mezbûr Abdülkādir Efendi’ye fıddî nakd-i râyic fi’l-vakt otuz bin akçe ile hîn-i akidde müşârün-ileyh[in] olup ba‘de’l-kabz meclis-i akidde mudî‘a adedi nâ-ma‘lûm bir kabza fülûsa tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm edip ol dahi vech-i meşrûh üzre iştirâ ve tesellüm eyledikden sonra semen-i mezbûr otuz bin akçeyi bi’t-tamâm ve’l-kemâl karındaşım mezbûr Abdülkādir Efendi yedinden ahz ve kabz eyledim ba‘de’l-yevm zikr olunan menzil karındaşım mûmâ-ileyh Abdülkādir Efendi’nin mülk-i müşterâsı olmuşdur. Keyfe mâ yeşâ’ ve yahtâr mutasarrıf olsun dedikde mukırra-i mezbûre Hatice’yi minvâl-i meşrûh üzre cârî olan ikrâr-ı meşrûhasında el-mukarru lehü’l-merkūm Abdülkādir Efendi bi’l-muvâcehe tasdîk ve bi’l-müşâfehe tahkīk etmeğin mâ vaka‘a bi’t-taleb ketb olundu. Tahrîren fi’l-yevmi’s-sâdis aşer min Şevvâli’l-mükerrem li sene seb‘a ve erba‘în ve elf. Şuhûdü’l-hâl: Mustafa Efendi b. Mehmed el-Müderris eş-şehîr bi Mercimekzâde, Mehmed Efendi b. Murad el-Müderris, Abdülkādir Efendi b. Mehmed Efendi el-Eyyûbî, Hüseyin Efendi b. Abdullah el-Kâtib, Mustafa Efendi b. Ali el-Kâtib, Mehmed Efendi b. el-Hâc Osman el-Kâtib, el-Hâc Abbas b. ( ) el-Muhzır, İskender Bey b. ( ) el-Muhzır, Ali Çelebi b. el-Hâc Mehmed el-Muhzır, Abdullah Halîfe b. Ma‘den el-İmâm, Abdi Beşe b. ( ) er-Râcil, Mehmed b. ( ) el-Cündî, İsmail Halîfe el-Müezzin ve gayruhüm.