Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 311 Hüküm no: 387 Orijinal metin no: [62b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Afife Hatun bt. Hüseyin Ağa’nın tasarrufunda olan çayırın sınır tesbiti Bi’l-fi‘l Mirahor-ı kebîr olan iftihârü’l-emâcid ve’l-ekârim, câmi‘ü’l-mehâmid ve’l-mekârim Halil Ağa hazretlerinin tarafından husûs-ı âti’z-zikri ikrâra hasm-ı câhid mahzarında nehc-i şer‘î üzre vekâleti sâbite olup bi’l-fi‘l Istabl-ı âmire kethüdâsı olan kıdvetü’l-emâsil ve’l-akrân Ahmed Ağa mahfil-i kazâda zikri âtî bir kıt‘a çayıra mutasarrıfe olan işbu bâ‘isetü’l-kitâb Afîfe Hâtun bt. Hüseyin Ağa tarafından ikrâr-ı câ’i’z-zikri tasdîka bimâ hüve nehcü’s-sübût şer‘an vekâleti sâbite olup haseki kethüdâsı olan İbrahim b. ( ) muvâcehesinde bi’l-vekâle ikrâr ve takrîr-i kelâm edip umûmen mîrî çayırların hudûd ve sınırları muhtel ve müşevveş olmağla her birinin üzerine varılıp ehl-i vukūf ihbârı ile hudûdun ta‘yîn ve tebyîn ve müceddeden alâmetler vaz‘ olunup sâbıkan mîrî çayırlardan iken mürûr-ı eyyâm ile âhar kimesneler tasarruflarında bulunan çayırlar ba‘de’s-sübûti’ş-şer‘î ke’l-evvel cânib-i mîrîye hükm ve zabt olunmak fermân olmağın ber mûceb-i fermân-ı âlî medîne-i Hazret-i Ebî Eyyûb el-Ensârî -radiye anhu Rabbühü’l-Bârî- kurbunda Topçular nâm mevzi‘de vâki‘ bir tarafdan merhûm Esad Ağa vakfı ve bir tarafdan mîrî çayır ve iki tarafdan tarîk-i âm ile mahdûd olup mezbûre Afîfe Hâtun cümlesi Sultan Bayezid Hân vakfı olmak zu‘mu ile mutasarrıfe olduğu tûlen ve arzen kırk dönüm çayırın üzerine varılıp tarîk-i âm tarafında otuz dönümü kadîmden Sultan Bayezid Hân vakfı ve mîrî çayıra muttasıl olan tarafdan on dönümü mîrî çayırından olduğu zeyl-i kitâbda mastûrü’l-esâmî olan ehl-i vukūf ihbârıyla ma‘lûm olmağın, zikr olunan on dönüm çayır cânib-i mîrîden zabt olunup, etrâfına alâmetler vaz‘ olundukdan sonra merhûm-ı mezbûr Sultan Bayezid vakfı olan otuz dönüm çayır mezbûre Afîfe Hâtun yedinde ibkā olunmuşdur. Mârrü’z-zikr otuz dönüm çayırda kat‘â mîrînin alâka ve medhali yokdur dedikde vekîl-i müşârün-ileyh Ahmed Ağa’nın minvâl-i meşrûh üzre bi’l-vücûh cârî olan ikrârını vekîl-i mezbûr İbrahim bi’l-vekâle vicâhen tasdîk ve şifâhen tahkīk edicek mâ vaka‘a ketb olundu. Fi’l-yevmi’s-sâbi‘ aşer min Şevvâli’l-mükerrem li sene seb‘a ve erba‘în ve elf. Şuhûdü’l-hâl: İbrahim Çelebi b. ( ) Ser-korucuyân, Mustafa b. Abdullah emîn-i muhassıl, Ali b. Abdullah, Ahmed Çelebi b. Mustafa er-Râcil, İbrahim Çelebi b. (…) er-Râcil, Mustafa b. Receb, Mehmed b. Mehmed er-Râcil, Aydın b. Abdullah, Halil b. Mehmed ve gayruhüm.