Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 312 Hüküm no: 389 Orijinal metin no: [63a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ritâpe bt. Abdullah’ın Mehmed Çavuş aleyhindeki menzil davasından vazgeçtiği Havâss-ı Aliyye kazâsı müzâfâtından Ayapa nâm karye sâkinelerinden Ritâpe bt. Abdullah nâm hâtun meclis-i şer‘-i hatîr-i lâzımü’t-tevkīrde işbu hâmilü’l-kitâb Mehmed Çavuş mahzarında bi tav‘ihâ ikrâr-ı tâm [ve] takrîr-i kelâm edip bundan akdem hâzır bi’l-meclis olan zevcim Cafer Bey b. Kurd, Havâss-ı mezbûreye tâbi‘ Küçük halkalı nâm karyede vâki‘ bir tarafdan Mustafa Ağa mülkü ve bir tarafdan Ebûbekir Beşe mülkü ve bir tarafdan Halil Beşe mülkü ve bir tarafdan tarîk-i âm ile mahdûd olup büyût-ı müte‘addideyi müştemil olan mülk menzilini, cümle tevâbi‘ ve levâhıkı ile mezbûr Mehmed Çavuş’a altı bin akçeye bey‘ ve teslîm ve kabz edip lâkin hudûd-ı mezbûr dâhilinde ben kendi malım ile nefsim için binâ eylediğim iki bâb fevkānî beyti ve altında bir ahırı merkūm Mehmed Çavuş’dan taleb ve da‘vâ eylediğimde beynimizde münâza‘ât-ı kesîre ve muhâsamât-ı adîde vâki‘ olmuşidi hâlâ terk-i da‘vâ eyledim min ba‘d husûs-ı mezbûra müte‘allik da‘vâ ve husûmetden bi’l-külliye mezbûr Mehmed Çavuş’un zimmetini ibrâ-i âmm-ı kātı‘ü’n-nizâ‘la ibrâ ve iskāt eyledim ba‘de’l-yevm husûs-ı mezbûra müte‘allik mezbûr Mehmed Çavuş ile da‘vâ ve nizâ‘ım yokdur dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Tahrîren fi’l-yevmi’r-râbi‘ aşer min Şevvâli’l-mükerrem li sene seb‘a ve erba‘în ve elf. Şuhûdü’l-hâl: Receb Efendi b. Abdi, Mahmud b. Ahmed, Mustafa b. Veli, Ali b. Mustafa, Mustafa b. Ahmed, Ali b. Abdullah, Cafer b. Abdullah.