Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 314 Hüküm no: 391 Orijinal metin no: [63a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Âişe bt. Yusuf ile Meryem bt. Abdullah’ın menzillerini İshak Çelebi b. Veli’ye sattığı ve İshak Çelebi’nin komşu Ali Beşe’nin zimmetini ibra ettiği Medîne-i Hazret-i Ebî Eyyûb el-Ensârî mahallâtından Zeyneb Hâtun mahallesinde sâkin Âişe b[t]. el-Hâc Yusuf nâm kimesne ile Meryem bt. Abdullah nâ[m] hâtun mahfil-i kazâda işbu râfi‘ü’l-kitâb İshak Çelebi b. Veli mahzarında her biri ikrâr-ı tâm ve takrîr-i kelâm edip mahalle-i mezbûrede vâki‘ bir tarafı Ali Beşe b. İbrahim mülkü ve bir tarafı İbrahim Çelebi b. Hızır mülkü ve iki tarafı tarîk-i âm ile mahdûd bir bâb fevkānî ve bir bâb tahtânî odaları ve ahırı ve kenîfi ve bi’r-i mâ ve muhavvatayı müştemil ale’l-iştirâki’s-seviy mülkümüz olan menzilimizi, merkūm İshak Çelebi’ye tarafeynden îcâb ve kabûlü hâvî bey‘-i bâtt-ı sahîh-i şer‘î ile on altı bin nakd-i râyic fi’l-vakt fıddî akçeye bey‘ ve teslîm edip ol dahi iştirâ ve tesellüm eyledikden sonra semeni olan meblağ-ı mezbûr on altı bin akçeyi merkūm İshak Çelebi yedinden bi’t-tamâm ahz ve kabz eyledik dediklerinde gıbbe’t-tasdîki’ş-şer‘î merkūm İshak Çelebi dahi mezbûr Ali Beşe mahzarında ikrâr ve i‘tirâf edip kıbel-i şer‘den mansûb vasîsi olduğum merhûm Mehmed Beşe’nin kızı Sâliha nâm sagīrenin malından merhûm Ali Beşe zimmetinde olan sekiz bin akçeyi merkūm Ali Beşe yedinden bi’t-tamâm ahz ve kabz eyledim sagīr-i mezbûrenin malından merkūm Ali Beşe zimmetinde bir akçe ve bir habbe bâkī kalmadı dedikde merkūm Ali Beşe vicâhen ve şifâhen tahkīk etmeğin mâ hüve’l-vâki‘ bi’t-taleb ketb olundu. Fi’l-yevmi’l-ışrîn min Şevvâli’l-mükerrem târihuhu’l-mezbûr. Şuhûdü’l-hâl: Mustafa Halîfe b. Ali el-İmâm, Halil Halîfe b. Mehmed, Mehmed Çelebi b. Hasan, Ali b. İbrahim, İbrahim [b.] Cafer, Hüseyin b. Abdullah, Mehmed b. ( ), Mahmud b. Abdullah, İbrahim b. Abdülkādir.